New Serchhip North Branch YMA Silver Jubilee lawmna Bialtu MLA-in hmanpui

Nimin khan New Serchhip North Branch YMA chuan an branch-in kum 25 (Silver Jubilee) an tlin lawmna hun an hmang a, he hun hi Bialtu MLA Lalduhoma chuan Khuallian niin a hmanpui.

Lalduhoma hian Jubilee lungphun hawnna neiin, Silver Jubilee lawmna atana pandal an zar, Zofa Run-a hun an hmannaah Bialtu MLA chuan thu sawiin, Serchhipin hlawhtlinna tam tak a neihte – Horticulture lama lawmman pakhatna a dawnte, faina intihsiaknaa pakhatna a ni theite chu lawmawm a tih thu sawiin, Serchhip mipuite chungah lawmthu a sawi a. Nakuma Serchhipin Mizoram pum huap hun pawimawh a thlen tur chungchangte sawiin, a lo dawnsawn danah Serchhip mipuite ṭanrual a pawimawh thu a sawi a. A bial chhunga hmachhawp leh hma lakna hrang hrang sawiin, Chawm lei dawh mek pawhtu kawng (Zote kawng) chu leilet paltlang kawng a nih avangin a pawimawh a, tun aia ṭha zawka kawngpui sial tura hma lak a nih thute, Serchhip khaw hlui, Kawlri tlang tuaihnum leh, khualzin hip thei tura hma a lo lak tawhnain hma a sâwn zel thu te a sawi.

Bialtu MLA hi ZPM Headquarters lamah an hruaitu K.Sapdanga leh Phairothanga bakah mi ṭhenkhatte’n an ṭawiawm a, K.Sapdanga pawhin thusawiin, YMA member infuihna thu ṭha tak takte a sawi a, khawtlang ṭhatna tur mai bakah, a ram pum ṭhatna tura ngaihtuahna sen ṭheuh a ṭul thu te a sawi bawk.

Bialtu MLA Lalduhoma hi New Serchhip North Branch YMA chuan Zo-Arpui tui lai puichhuahin, Jubilee t-shirt an lo pe bawk a ni.

Silver Jubilee lawmnaah hian zaithiam tak tak zai ngaihthlak a nih bakah Jubilee hmanpuitu dangte hnen aṭangin thusawi ngaihthlak a ni a, hruaitu hluite chawi-mawina hun an hmang a ni.

New Serchhip North Branch YMA hian ‘New Serchhip Branch YMA’ tia indin chhoh aṭangin an din hun hi an chhiar ṭan a, tunah chuan New Serchhip Branch YMA chu Branch pali-ah inṭhen darh leh tawhin, heng branch pali inṭhen darh zingah hian New Serchhip North Branch hi an tel a ni.

Leave a Reply

This site uses Akismet to reduce spam. Learn how your comment data is processed.