Chief Secretary-in All India Cooperative Week khârna hun a hmanpui

Nimin chawhma khan Vanapa Hall-ah Mizoram State Cooperative Union leh Cooperation department ṭangkawp buatsaih 66th All India Cooperative Week, 2019 kharna hun hman a ni a, Lalnunmawia Chuaungo, IAS, Chief Secretary chu khuallian niin JP Agrawal, IAS, Secretary, Cooperation Department chu khual zahawm a ni bawk.

Khuallian Lalnunmawia Chuaungo chuan thusawiin, Mizoramah Cooperative Society vanga hmasawnna thleng mek chu lawmawm a tih thu sawiin Mizoram Cooperative Apex bank pawh Mizoram chhunga bank hna thawk tha ber pawl dinhmun luahtu a nih mek thu a sawi. Khuallian chuan Cooperative Society chu hmasawn tumna kawnga duh zawng leh tuina inang mi hrang hrang kal khawmna a nih avangin pawl tha leh chak tak a nih thu a sawi a, hmun kilkhawr zawk thleng phak hmasawnna hna thawktu pawimawh tak an nih thu a sawi bawk. Chief Secretary chuan Cooperative Society chu induhsak bik awm lohna leh rual khai taka in dawm tawnna pawl a nih thu sawiin hlawhtlin tuma bei tak tak te zirchian a, a tul huna puitu ni thin turin hruaitute chu a chah bawk a ni. Pu Lalnunmawia chuan mahni tana tha tur leh hlawkna turah chuan Sawrkar inrawlh ngailo a mahni phak tawk a hmalak tum ve a tul thu sawiin chutiang ang rilru pu a neitu nihna thinglung nen thahnem ngai tak a hmasawnna hna thawk thin turin kalkhawm te a fuih bawk a ni.

Khual zahawm JP Agrawal pawhin thu sawiin Cooperative Society-ah Mizo ṭhalai lehkhathiam tam zawk lût tura a duh thu a sawi a, Mizoram chu khawtlang inpawh tak leh inthliarna awm lo a nih avangin Cooperation anga hnathawh-na hmun nuam tak a nih thu a sawi bawk a ni.

All India Cooperative Week kharna hun hi K.Lal-chamreia, President, MSCU in a kaihruai a, Mizoram Chief Minister Zoramthanga, C.Lal-rinsanga, Cooperation department Minister leh Dr Chandra Pal Singh Yadav, President, National Cooperation Union of India-ten Cooperation week puala thuchah an ziahte ngaihthlakna hun hman a ni a. Cooperation Flag pawhpharh-na hun leh Tlaugau Special edition lehkhabu tlangzarhna hun Khuallianin hmangin Cooperative Society engemawzat ten an thil siamte lei theihin an phochhuah bawk a ni.

Cooperation department-a thawktute tarlan danin State level Cooperative Society 11 leh Primary level cooperative society 1173 a awm mek a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram