Nimin khan Mizoram Legislative Assembly Session chu Speaker Lalrinliana Sailo hova neih chhunzawm leh a ni a, member pathumin House-ah paper an pharh a, report pahnih lutin; bill pahnih lut sawi hova pawm a nih bawk.
Zawhna leh chhanna hunah Food, Civil Supplies & Consumer Affairs Minister K.Lalrinliana chuan, Tlabungah tun financial year chhung ngeia petrol pump dah fel hman tum a nih thu Nihar Kanti Chakma zawhna chhangin a sawi a.
Supply Minister chuan, Tlabunga petrol dah hun tur chu sawrkar thuneihna ni lo mahse, IOC Limited atanga an hriat danin hma lak mek a ni, tih a sawi a. Kumin December ni 10-15 inkar chhung hian a hmunhma turte enfel turin Company lam an lo kal dawn a, hun rei lote chhungin peih fel hman tum a nih thu a sawi.
RUSA hnuaia Mizoram College hrang hranga thawk turin mi 65 lak an ni tawh tih Higher & Technical Education Minister Dr. R.Lalthangliana chuan House a hrilh a. Vanlalhlana leh Dr.Vanlalthlana-te zawhna inṭawm chhangin Minister chuan, RUSA hnuaia Asst. Professor lak tharte posting chu hmun ṭhenkhatah chuan merit systema kalpui a nih laiin candidate te residential address mil tura siamrem a awm nual bawk tih a sawi a. Pukpui Engineering College chu a building te sak zawh ni tawh mahse, class tan tur chuan hmabak a la tam hle a ti a. Lengpuia NIT hmun tur buatsaih mek chungchang pawh sawiin Minister chuan, state sawrkar hnuaia awm a nih loh avangin inrawlh thui theih a ni lo a ti bawk.
Health & Family Welfare Minister Dr. R.Lalthangliana chuan, Japan International Cooperation Agency(JICA) atanga sum cheng vbc 500 Mizoram sawrkarin a dawn hmangin India hmarchhaka tha ber tura ngaih Super Speciality Hospital din tum a nih thu a sawi a, ṭhutkawm ah MLA Prof. F.Lalnunmawia zawhna leh zawhbelhnate chhangin Health Minister chuan, JICA hotute chu naktuk mai hian Mizoramah lo kalin hma lak dan turte an rawn enfel dawn a, ruahman anga siam a nih theih chuan India rama damdawiin changtlung ber pawla ngaih theih tura tha Mizoramin a nei thei dawn a ni, a ti. Hetih rual hian Zemabawka RIPANS tihchangtlunna tur leh Zemabawk Cancer Hospital tana sum hmuhtur pawh hmuh kimloh a nih thu a sawi.