Education Minister-in MBSE Office tlawh

Nimin khan School Education Minister Lalchhandama Ralte chuan MBSE office a tlawh a, an hnathawhna hmun hrang hrangte a enpui.

Minister puala inkawmna hun MBSE Conference Hall-a an buatsaihah Minister chuan thusawiin MBSE hna chu hna pawimawh, langsar si lo, biru tak anih thu a sawi a. Mi rinawm, thu ruk vawng thei, mahni hnaa inpe nih a tul thu a sawi. Kan ram zirnaah puanven sawi chhin a ngai tih sawiin, Minister chuan MBSE chu Academic Authority an nih anga tan la turin a fuih a. Kan Mizo nula leh tlangvalte national levelah an chanvo tur an chan theih nan Syllabus nge exam pattern tihdanglam ngai tih te pawh ngaihtuah tul nia a hriat thu a sawi bawk.

Minister chuan Office hnaah a hnuai ber atanga a chung ber thlengin kan pawi-mawh vek a, examination ah phei chuan kan duty theuhah kan theih ang tawka kan thawh hi a pawimawh vek a ni a ti bawk. MBSE in kum 40 chuang thuruk vawn kawngah te certificate dik lo hmanga sum siam thu-ah te hminghliauna a nei lo chu lawmawm a tih thu a sawi.

Minister hi L.Thangmawia Vice Chairman Human Resource Development Board in a tawiawm a, School Education Department a Additional Secretary leh Joint Secretary ten an tawiawm bawk a. MBSE Chairman leh thawktuten an lo dawngsawng a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram