FEMSE-in an Conference Reso-lution sawrkar ah an thehlut

Nimin khan Federation of Mizoram Samagra Employees (FEMSE) chuan ni 8.11.19-a Chamari YMA Hall-a General Conference an neihnaa Federation Resolution chu sawrkarah thehlutin, Esther Lalruatkimi, Commissioner, School Education leh Mizoram Legislative Assembly Speaker Lalrinliana Sailo hnenah FEMSE OB te hian an hlan a, an Resolution-te a hlawhtlin ngei theihnan chak taka hmalak an tum thu an sawi bawk.

FEMSe chuan hemi chungchanga thuchhuah an siamah, SSA leh RMSA an nih laiin theihtawp chhuahin an dinhmun a ngialngheh theih nan Association hrang hrangten hma an lo la tawh a, Central sawrkar aawanga SSA leh RMSA te huangkhata chhunfin a nih tak avangin Association hrang hrang te pawh huangkhatah lawiin, an zavaia hamṭhattlan theih nan hma an la ta tih an tarlang a.

FEMSE Resolution chu pahnih niin, pakhat zawk chu hlawh chungchang a ni a, SSA leh RMSA hnuaia thawk te hlawh hi 2011 hnu lamah ennawn emaw siamṭhat emaw a la awm ngai lo a, khawvel ṭhang zel leh thil man to zel dan chhutin an hlawh a hniam ta viau nia hriain hlawh chungchangah hian hma an la ta a. FEMSE hian hlawhsan ringawt ni lovin Pay Structure mumal tak neih an ngiat a, an Resolution-in a tarlan danin Basic leh Dearness Allowances neih an duh thu an tarlang a. Hei hian an hlawh chu sawrkar kalphung ang zela a hrana buaipui ngai loa an hlawh chungchang a tel ve zel theih nan Pay Structure mumal tak neih an duh thu an sawi a ni.

FEMSE Resolution pakhat zawkah chuan Education Department hnuaia hna lak turah Samagra hnuaia thawkte Corresponding Post awmah 70% chu thawk tawh sa leh sawrkara ṭhatlai hun lo hmang ral tawh Samagra hnuaia thawkte tana Reservation siam turin an ngen a, hun rei tak chhung sawrkar tana an thawh tawhna te, ṭhatlai hun zawng zawng an lo hmanral tawhna te sawrkarin zahsaka an tana Special Scheme ṭha tak siam tur leh Seniority-a Regular turin an ngen bawk a ni.

Heng an Resolution te hi chak taka bawhzui zel an tum thu sawiin, an hmalaknate sawrkarin bawhzui sak ngei turin an ngen a, an Resolution chungchangah November ni 20 thlenga thu lawmawm emaw hmalakna duhawm a awm lo a nih chuan na lehzuala hmalak an tum thu an sawi.

FEMSE hi ni 16 August 2019 khan din a niin, tunah hian Samagra hnuaia Association hrang hrang paruk: MIREWA, MSSTA, MISIA, SPRAM, MISEA, SEAM te he Federation-ah hian an inchhungkhawm a ni.He Federation hnuaiah hian thawktu mi 5000 bawr vel an awm mek bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram