Nimina ZPM chhung inkhawmah Phairothanga, General Secretary chuan thu sawiin, “Kan sawrkar hnarkaitu Minister-te leh contractor-te sam inphiar zawm leh hnungthak inhiah tawn avangin sawrkar hnathawkte kut phuar an ni a, sawrkar hnathawk kutphuar phelh a ngai a, kalphung thlak a ngai a ni.” a ti.
Phairothanga chuan, “Mizoram hmun hrang hranga kawngpui pawimawhte hi a tlo lo em em a, PMGSY kawng tam tak kum khat pawh daihlo kawngpui kan nei ṭhin hi a veiawm em em a ni. State danga an hman ve tho, IIT Kharagpur approved technology kan hmang a. SOR-te kan hmang diklo nge, kan engineer te an thiam lo bik em ni ang? Ni love, kan engineer rualte hi lehkha thiam thei tak tak, Engineering College ṭha tak taka mark sang tak tak hmu, mithiam tak takte an ni a, nungchang ṭha leh Pathian ṭih tak takte an ni a, ram leh hnam, khawtlang veinaah pawh kan tluklohte an ni hial zawk,” a ti.
Phairothanga chuan, “PWD hian Zuangtui-ah Quality Control Division an nei a, Lunglei-ah Sub Division an nei bawk. Hengah hian Laboratory ṭha tak tak a awm a, contractor-ten an lung hman tur te, an cement hman tur te leh a dangte an certified tir thin. Mahse, chung an hmanraw hman tur an certified chu an hmang tak tak em, an thawk ṭha em tih entu Project Implementation Unit (PIU) lam kutphuar an ni leh ṭhin si a. Chubakah, kawng siam an zawh hian hna zo an la ni lova, an hnathawh chu an vil zui tur a nih laiin a endiktu tur sawrkar hnathawkte kutphuar an nih ṭhin avangin Defect Liability Period-ah contractor te chu kan officer-ten an ko thei lova, a tawpah mipuiin kan tuar ta ṭhin a ni.” a ti bawk.