H&TE Minister leh MZP-ten Mizo thalaite zinga HIV+ pung chak lutuk veiawm an ti

Higher & Technical Education Minister Dr. R. Lalthangliana leh MZP hruaitute nimina inkawm chuan Mizo ṭhalaite zinga HIV positive an pung chak lutuk chu veiawm tiin, HIV do let turin Mizoram sawrkar leh MZP chu tun aia nasa zawka thawkhoin zirlaite hnenah ‘awareness campaign’ neih ni se, an ti.

Minister office-a an inkawmhonaah hian Mizo ṭhalaite zinga HIV vei an puang chak lutuk do let dan tur sawihoin, hetiang zela Mizo ṭhalaite zinga HIV positive an pung zel a nih chuan Mizo hnam tan a him lova, ṭhalaite chu Mizoram innghahna tak tak an nih avangin HIV do lêt turin Mizoram sawrkar leh MZP-te chu tun aia nasa zawka thawhho ni se, an ti a ni.

Zirlai Study Tour budget tihpun leh Mizoram University Southern Campus neih dan tur chungchang pawh sawihovin, MZP hruaitute chuan Mizo-ram College hrang hrangin study tour an neih nana cheng nuai 50 state sawrkarin a dah chu a beithamzia Chief Minister hnena an lo thlen tawh chu Minister hnenah hian an thlen nawn leh a, Minister chuan Study Tour nana sum dah chu a beithamzia hriat thiampuiin, sawrkarin cheng nuai 100 a dah tur thu MZP hruaitute chu a hrilh a ni.

MZP hruaitute chuan Mizoram University-a Seat-a tlem dan leh Mizo zirlai tam takin seat an chan loh dante, zirlai harsa zawkten thiamna sâng zawk beiseia zirna seat an chan ve theih nan Mizoram University Southern Campus chu neih a hun ve tawh takzet thu an thlen bawk a. Minister chuan Mizoram University Southern Campus nei turin Mizoram sawrkar chuan nasa takin a nawr mek thu sawiin, MZP rawtna leh ngenna angin chak taka hmalak chhunzawm a nih tur thu MZP hruaitute chu a hrilh a ni.