Home Minister Lalchamliana chuan kumin krismas leh kumthar vuakvetah mipuite’n boruak ralmuang an neih theih nan Police-te ngawrh takin an duty dawn a, kum dang aiin an khauh dawn tih a sawi.
Home Minister hian nimin khan Aizawl Press Club-ah Mizoram Journalist’s Association (MJA) member-te kawmin, mipuite’n boruak muanawm tak hnuaiah hlim leh lawm taka Krismas leh kum thar an hman chu sawrkar duhdan a ni a, hemi atan hian theihtawp an chhuah dawn a, kum dang aiin kuminah Police te chu an khauh zual dawn tih a sawi.
Home Minister chuan Halpuah leh halmawi hal hi kum engemawzat hlawhtling taka khap a nih hnuah kum 2013 khan sawrkarin a hâl avangin mipui an inthlahdul a, kuminah chuan Police leh YMA ṭangdunin khauh takin khap a ni dawn a, Police leh NGO ṭanghovin lirthei leh kea vak kualin dan bawhchhiate an vai ṭhin dawn tih a sawi a. Zu leh ruih theih thil dang ruia buaina siamte pawh manin, bail theih loha lung ina khung turin hmalak a ni ang, a ti a. Khapna thupek kenkawhna atana senso ngaite pawh Chief Minister sawipui tawhin, pek an nih tur thu a lo hrilh a ni, a ti.
Home Minister ṭawiawmtu DIG Lalbiakmawia Khiangte pawhin halpuah hal khap chungchangah hian man leh dan anga an chungthu ngaihtuah-sakte an lo nei tawh ṭhin tih a sawi a. Kuminah pawh dan bawh-chhetu a tam thei ang ber mana thubuai siamsak ngei an tum thu-te, vantlang himna tiderthawng thei lirthei tlan chak lutuk man tur pawhin kawngpui dunga Police leh YMA duty indah bakah a remchang laiah Beat post te an siam dawn a ni, a ti.