India ram pum huapa faina kawnga intihsiaknaah lawmman dawng

Nimin tlai dar 3 khan New Delhi-a World Toilet Day hmannaah kumina India rama thingtlang khawfai intihsiakna lawmman, Swachh Survek-shan Grameen (SSG) 2019 Award sem a ni a, Mizoram atanga lawman dawng zingah Serchhip District pawh telin, he award hi Er. F.Lalsanglura, EE, PHE, Serchhip chuan New Delhi-ah a dawng a ni.

SSG 2019 Award dawng tur hian Mizoram aṭangin Er. HC Lalnunzira, Director, WSSO hovin Serchhip bakah SSG 2019 Award dawng tur hian district dang pahnih Kolasib aṭangin H.Lallianmawia, EE, PHED leh Aizawl District aṭangin Er. C.Zothan-tluanga, EE, PHED-te an kal bawk a ni.

SSG 2019-ah hian India Hmarchhak State leh UT bakah State tenau (small state) zingah Mizoram chuan lawmman pakhatna a dawng a, SSG 2019-ah hian District ranking pawh siam niin, Kolasib District chu pakhatna (1st)-ah awmin, Serchhip chu pahnihna (2nd) a ni a, Aizawl District chu pathumna (3rd)-ah a awm bawk a ni.

PHE Department hotute chuan hetianga rampum huap lawmman Serchhip District-in a dawng thei hi lawmawm an tih thu an sawi a, department thawktute leh mipuite tanrualna vanga hetiang lawman hi dawng thei an ni tih sawiin, lawmthu an sawi tak meuh meuh a ni.

Award semna inkhawm hi Union Minister for Chemicals and Fertilizers leh Rattan Lal Kataria, Minister of State for Jal Shakti and Social Justice & Empowerment-ten an hmanpui a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram