Lawngtlai District Hospital-a solar energy hman loh MJA-ten en

Lawngtlai District Hospital-a ni zung chakna hmanga kawlphetha pek chhuahna tur, kum 2015-a enchhin tawh, tun thlenga la hman theih loh chu nimin khan Lawngtlai District MJA-ten a hmunah an en.

Medical Superintendent, Dr. Zothanpari Chhakchhuak leh a thawhpuiten MJA-te hi lo dawngsawngin, District Hospital-a Solar Energy hmanga kawlphetha pek chhuahna tur hi Ministry of New & Re-Newable Energy aṭanga hmuh, EMMVEE Photovoltaic Power Pvt. Ltd. Bangalore ten an thawh a ni a, kum 2015 July thla khan bun felin enchhin nghal a ni a; hemi tum hian enchhinna hi hlawhchhamin hemi hnu hian buaipui chhunzawmna mumal a awm tawh lova, Mizoram sorkar Health & Family Welfare Department chuan ZEDA chu enfiahsak turin an beisei mek tih Hospital thuneitute chuan an sawi.

He nizung chakna hmanga kawlphetha siam chhuah nan hian Solar Module 448 hman a ni a, Battery 240 dah a ni bawk a; ruahmanna ang chuan kawlphetha a pek chhuah tam theih lai berin Kilo watt 100 pe thei tura ngaih a ni.

Lawngtlai District MJA te chuan, District Hospital tana thil tangkai tak tur hman theih loha a awm reng chu thunei-tuten chak zawkin ngaihven se an duh thu an sawi a. District Hospital sak mek pawh tlawh nghalin, an tlawh hmasak tuma siam that ngai nia an hriat te siam that a ni chu lawmawm an tih thu an sawi.

Leave a Reply

This site uses Akismet to reduce spam. Learn how your comment data is processed.