Zothlifim Logo
Loading ...

Land & Revenue Settlement Minister Lalruatkima chuan LSC lem leh felfai lo tam ta em em chu manganthlak a tih thu a sawi a, Land Revenue & Settlement Department chu Department chinfel ngai tam tak nei tia miten an hriat chu zahthlak takzet a ni, a ti bawk.

Nimina ‘Mizoram Survey and Land Record Service Association (MISLARSA) General Body Meeting and Training Cum Workshop’, Directorate of Land Revenue & Settlement Meeting Hall-a a hawnnaah Minister chuan he thu hi a sawi a, Lalruatkima chuan Department hotute hmalaknaa MISLARSA General Body Meeting leh Training Cum Workshop buatsaih a ni chu lawmawm a tih thu sawiin, Department hnathawhna kawngah nasa takin hma a sawntir ngei a beisei thu a sawi a ni.

Minister chuan Land Revenue & Settlement Department chu hnathawk nasa ber pawl Department a ni a, chhungkaw tin nghawng thei thil khawihtu Department niin, fimkhur pawh a ngai takzet a ni, a ti a. Dan hrang hrang kaihhruaina hnuaia hna thawh a ngaih a vangin rilru, taksa, thlarau hrisel neih a ngai a, nasa lehzual zawka rilru leh ngaihtuahna pawh pek a ngai a ni, tiin a sawi a. Sawrkarin Land Surveyor te indaihlona chu a hriatpuia, hma pawh lak tum a nih thu a sawi a, hei bakah hian Surveyor te training na tur Institution din tum a nih thu a sawi bawk a ni.

Minister chuan thil chhete tihsual avang pawhin mi chhungkua Department in a ti buai thei a ni tih hriat reng a ṭha a, fimkhur tak leh belhchian dawl taka thawk turin Land Surveyor te chu a sawm a. India rama State dangte en chuan Land Revenue & Settlement Department chu sum leh pai dinhmun siamtu, thawkchhuaktu leh sawrkar khai ding bertu a ni a, Mizoramah pawh sawrkar sum leh pai dinhmun siamtu Department leh Scheme/Project tam taka State Matching Share pawh awlsam zawka phuhruk theitu Department a ni thei a ni, tiin a sawi a. Training Cum Workshop chuan thiam tawh sa intuaihriamna bakah hmasawnna thawktute hnenah a thlen theih ngei a beisei thu a sawi bawk a ni.

He hunah hian Special Secretary R.Lalramnghaka chu Khualzahawm a ni a, MISLARSA General Body Meeting leh Training Cum Workshop-ah hian member 100 chuang an kalkhawm a. Session Hnih a ṭhen a ni a, Hruaitu thlan, Inkaihhruaina Dan ennawn leh thildangte programe ah hian a telh a ni.