Categories
Chanchinthar Infiamna Mizoram Serchhip

Mizoram pum Chess Intihsiaknaah David Laldintluanga, New Serchhip a champion

Mizoram Chess Association (MCA) leh Serchhip District Chess Association (SDCA) ṭangkawpin an buatsaih, 21st Mizoram Open Chess Championship 2019 chu nimin khan zawhfel niin, David Laldintluanga, New Serchhip chu a champion.

October ni 29 aṭanga ṭan, 21st Mizoram Open Chess Championship 2019 khârna inkhawm hi nimin khan New Serchhip YMA Hall-ah neih a ni a, khârna inkhawm hmanpuitu H.Dolianbuaia, Project Director, DRDA, Serchhip chuan thusawiin, Chess game chu amah pawhin a khelh ve ṭhin thu sawiin, Chess game chu thluak sawi zawina ṭha tak nia a hriat thu a sawi a, Mizoram hmun hrang hrang aṭanga he championship-a tel tura Chess player engemawzat an rawn kal chu lawmawm a tih thu a sawi a, Chess-ah chuan naupang zawkte international thlenga khel thei tura inchher chhoh tum turin a chah a ni.

He huna report petu – Chief Arbiter Lalthazama, Nationsl Senior Arbiter chuan kum 2015 aṭangin MCA chuan ranking an siam ṭan thu sawiin, tun ṭum championship-ah hian Mizorama Player ṭha an tel kim hle tih sawiin, Seeding-ah MCA Rating hman a nih thu leh Mizoramah rated player 720 an awm tih a sawi a, tun ṭum championship-ah hian MCA Rated Players – 44 leh Unrated players-8 an tel thu sawiin, Aizawl District aṭangin Players 19, Lunglei District aṭangin Players 6, Champhai District aṭangin Players 3, Lawngtlai District aṭangin player 1, Serchhip District aṭangin players 15 leh Siaha District aṭangin Player 8 tel tih sawiin, player zawng zawng hi 52 an ni tih a sawi a. MCA member aṭangin khawvela Chess lama thuneitu sang FIDE hnuaiah Arbiter an neih phak bakah FIDE coach pawh pahnih an nei tawh tih a sawi bawk.

Vanlalzarliana, President, MCA kaihhruaiah hian MCA President Dr. Lalhmuchhuaka pawhin thu a sawi a, Lalrinawma, Secretary SDCA chuan lawmthu a sawi a, MCA hian District thar, Hnahthial hnenah Chess Set 5 leh Chess Clock 2 an hlan bakah Championship thlengtu Serchhip hnenah Chess Set 5 an hlan a ni.

He Championship-a champion David Laldintluanga hian hneh loh nei lovin point 7.5 a hmu a, lawmman pawisafai 20,000/- leh Certificate leh Trophy a dawng a, pahnihna Anthony Lalṭhasanga, New Siaha chuan15,000/- leh certificate dawngin, pathumna Robert Runremmawia, Lunglei chuan 10,000/- leh Certficate a dawng a, palina Stephen Ms Tluanga, Tlangnuam Vengthar, Aizawl chuan7,000 leh Certificate dawngin, pangana R.Sangvunga, Leitan, Durtlang chuan `5,000 leh Certificate a dawng bawk a. Heng bakah hian Top 30-a lang mi dang 25-te hnenah lawmman pawisafai leh certificate hlan ṭheuh an ni a, he championship-a player upa ber, Sakhawliana, Tlang-nuam leh player naupang ber Magnus Rampanmawia, Champhai-te hnenah lawmman pek a ni bawk.

By Editor

C.Lalrochhuanga,
New Serchhip, Serchhip - 796181
Mizoram
Contact: WhatsApp | Phone Call | Telegram