Categories
Chanchinthar Serchhip

Synod Social Front buatsaih plumbing training zofel

Synod Social Front buatsaiha Serchhip leh a chhehvel khaw 10-a ṭhalai 21-ten In chhunga pipe hmanga tui inpêk kual dan (Plumbing) training hlawhtling takin an nei

Serchhip Kawnpui kohhranah Serchhip District Plumbing Training hi tun thla ni 21 aṭang khan neih niin, nimin chhun dar 11:30 khan a kharna hun Serchhip Kawnpui kohhran Diamond Jubilee hall ah neih a ni a. He inkhawm Serchhip bialtu Pastor Rev.H.Lalawmpuia kaihhruaiah hian Social Front Coordinator Lalnuntluanga Aizawl chuan thu sawiin, kohhran rawngbawlna hrang hrangte hi mahni telna bik ngaih pawimawh a awl hle a, mihring nun siamṭhatna thlarau lam khawih thil a nih avangin a pawimawh em em vek a ni a ti a. Tunlai hian ruihhlo a hluar hle a, damdawi lam a tlem deuh chuan Kanja a rawn pung ve leh a, Kanja chu online-a chah theih hial a ni ta a. HIV / AIDS lo hluar mek karah leh politics kalpui dan dik lo lutuk te leh lehkhathiam hman tlak loh lo pung mek karah a siamthat hna kohhranin a thawh zel a tul ta a ni a ti.

He huna report pe a thusawitu Training Director Upa R.Laldaihzauva Serchhip Kawnpui kohhran pawhin hetiang training tangkai lutuk plumbing bik hi Serchhhipa a vawi khatna a ni tiin, Electric wiring leh thil dang dangah pawh training hi neih leh thin nise a duh thu a sawi a. An mamawh an dil anga thawhpuia training zirtirtu leh hmanrua ngaihtuahsaktu PHE Department Serchhip hotute chungah leh Serchhipa Training rawn nghattu Mizoram Synod Social Front hruaitute chungah lawmthu a sawi.

Serchhip District Plumbing Training kharnaah hian an mahni zirtirtu pahnih zinga pakhat Lalfamkima Serchhip Hmar Veng leh zirtu aiawhin Vanlalzawmliana Serchhip Chhim Vengten thu an sawi bawk a, trained chhuakte chu Synod Family Guidance & Councelling Centre Serchhip Coordinator Rev Ramnghing-lova’n certificate a hlan a. Pro Pastor Lalrinmawia Chhangte in lawmthu sawiin a tin a, he hunah hian zaithiam zai ngaihthlak a ni bawk.

By Editor

C.Lalrochhuanga,
New Serchhip, Serchhip - 796181
Mizoram
Contact: WhatsApp | Phone Call | Telegram