Zothlifim Logo
Loading ...

Nimin khan Sports & Youth Services Minister Robert Romawia Royte chuan Mizoram State Games atana inkaihruaina tur Mizoram State Games Technical Handbook a tlangzarh.

Mizoram State Games Technical Handbook tlangzarh-na inkhawm hi Directorate of Sports & Youth Services Office, MINECO-ah neih niin, Director Zothanmawia chuan a kaihruai a. Minister hian Mizo-ram State Games Office Chamber hawnna Directorate of Sports & Youth Services Office First Floor ah a nei nghal bawk a ni.

Mizoram State Games-ah hian inelna hrang hrang 32 buatsaih a ni ang a, chungte chu- Aquatics, Archery, Arm Wrestling, Athletics, Badminton, Basketball, Body Building, Boxing, Carrom, Chess, Cricket, Fencing, Football, Hockey, Indigenous Games, Judo, Karate, Kick Boxing, Motor Sports, Muaythai, Power Lifting, Sepaktakraw, Shooting, Snooker, Table Tennis, Tennis, Tug of War, Taekwondo, Volleyball, Weight Lifting, Wrestling, Wushu a ni.

Heng zingah hian Athletics leh Indigenous Games te hi a lian zual an ni a, Athletics-ah hian 100M Race, 200M Race , 800M Race, 1500M Race, 10000M Race (Men), 5000M Race (Women), High Jump, Long Jump, Shot Put, Discus, Javelin te telh a ni a. Indigenous Games ah hian Mipa tan Insuknawr-Below 75 kg, Above 75 kg, Team Open (3 Players+1 Sub); Mizo Inbuan-Below 75 kg, Above 75 Kg; Insaihruipawh- Below 75 kg, Above 75 Kg;Insukherh- Below 75 kg, Above 75 Kg; Sairawkherh Perh (Open), Khanchhuk Invuakthlak (Open) leh hmeichhe tan Inkawibah (Team-5 Members) te telh a ni bawk a ni.

Technical Rules tlangpuite:

  1. Event tinah Constituency atangin team/player pakhat zel chauh tel phal a ni.
  2. Player chu Voters ID a neihna Constituency chhung a mi ngei a ni tur a ni. A finfiahnan Voters ID/Aadhaar Card/Birth Certificate ken ngei tur a ni.
  3. Mizoram State Games 2019-ah hian Kum bitliah a awm lovang.
  4. Sports Discipline-ah mi tupawh a duh zat zatah tel (participate) theih a ni.
  5. Mimal medal la hnem ber mipa leh hmeichhia Lawmman siam a ni ang.
  6. MLA te tan bik-Constituency Voter List-ah hming a awmlo a nih pawhin Player angin an tel ve thei ang.
  7. Sports hmanrua/dress te mahni constitutency zel intum tur a ni.
  8. Discipline inbul (Weight In) ngai zawng zawngte Dt. 9/12/2019 Zing Dar 6:30-ah AR Ground (Lammual) Pavillion-ah inbuk vek tur a ni.
  9. National Federation Game Rules hman ani ang
  10. Indigenous Games-ah chuan Mizoram Indigenous Games Association Game Rules hman a ni ang.
  11. Sports Discipline tina State Sports Association-ten Technical lama thuneihna tawp an nei ang.
  12. Heta lungawi lo te chuan Chairman, Jury of Appeal hnenah thlen leh theih a ni ang.
  13. Mizoram State Games 2019-ah hian Constituency tihṭhat dan inelna atan Medal Tally hman a ni ang. Overall Champion, Pahnihna leh Pathumna te Trophy pek an ni ang.