Mizoram zau zawng atanga za-a 32.07 chu mau awmna hmun a ni

Mizoram zau zawng za-a 32.07-a zauah mau awmna hmun ni anga chhût a ni a, India rama mau chinna hmun za-a 14 chu Mizoram a awm anga chhût a ni.

He thu hi Zirtawpnia ‘Bamboo Composite Materials for Structural Applications’ tih thupui hmanga Aizawl MINECO-a seminar buatsaihah tarlan a ni a, Seminar-a tarlan danin Mizoramah hian 6760.71 Sq.Km chu mau awmna hmun a ni a, Mizoram zau zawng za zelah 32.07 ang nia chhût a ni. India rama Mau chinna hmun za zela 14 chu Mizoram a awm anga chhût niin, 24 species indigenous leh 12 species chu introduced anga chhinchhiah a ni a, Mamit leh Lunglei district-ah mau hi a tam zual a ni. Mizoram mau species hrang hrang zinga 95% chu Melocanna Baccifera (Mautak) a ni a, CSIR-AMPRI a mithiamte chuan he species hi thil hrang hrang siamchhuah nana hman nasat mau species a nih thu an sawi a. Seminar-ah hian traditional piah lama mau hman ṭangkai dan hrang hrangte ngaihthlak a ni a, Bamboo Composite hmanga insakna bungrua siam dante thlirho a ni bawk.

He seminar hi Dr K Pachhunga, MLA, Vice chairman, Mizoram Bamboo Development Board ni bawk chuan hmanpuiin, Dr K.Pachhunga chuan Mizoram sawrkarin hna thawk turin kawng hrang hrangin hmalak a tum mek thu sawiin, chumi atan chuan Socio-Economic Development Programme kalpui nan Board hrang hrang din a nih thu a sawi a, chumi hnuaiah chuan Bamboo Development Board hmangin Mizoram a maute ṭangkai zawka hman a nih theih nan hmalak a nih tur thu a sawi bawk.

Mizoram chhungah Mau chu a hranpaa enkawl a ngaih loh avangin Chief Minister pawhin ram hmasawn nan tangkai taka hman atana hmalak anih tur thu a sawi a, mau a hausakna hi thiamna hmanga tlo zawk leh hlu zawka sawngbawl thiam a ṭul thu a sawi a. Mizoram ram hruaitu zingah Science lama tui mi ṭhahnem tak an awm thu sawiin, ram tana thutlukna pawimawh tak tak siam kawngah hemi hian hmasawn-na a thlen ngei a beisei thu a tarlang.

He hun hmanpuitu dang F.Lalnunmawia, MLA, Vice Chairman, Horticulture Development Board ni bawk pawhin thu sawiin, hun rei tak chhung Mizorama Mau awmte ṭangkai taka hman a nih theih nan ngaihtuahna a sen ṭhin thu a sawi a, CSIR-AMPRI leh MISTIC ṭangkawpin hma an lâkna chuan rah chhuah ṭha a neih ngei a beisei thu a sawi bawk.

Seminar-ah hi Dr Lalnuntluanga Colney, Principal Scientific Officer, DST-in hun a kaihruai a, Dr SKS Rathore, Senior Principal Scientist leh Dr AK Srivastava, Director, CSIR-AMPRI-ten Mau hmanga insakna hmanrua siamchhuah a nih dan leh hlâwk zawka tihral a nih theih dante sawifiahna hun an hmang a. Dr S.Murali, Principal Scientist in ‘Overview and Prospects of Major Bamboo species in India for Multi-purpose Application’ leh Dr SAR Hashmi, Chief Scientist in ‘Bamboo composites: A new material of Construction’ tih hmangin presentation an pe a, Davy Lalruatliana, Scientific Officer, MISTIC in ‘Bamboo Resources in Mizoram’ hmangin presentation a pe bawk.

He hun hi Mizoram Science, Technology & Innovation Council (MISTIC), Directorate of Science and Technology, Mizoram leh Council of Scientific and Industrial Research – Advanced Materials and Processes Research Institute (CSIR-AMPRI), Bhopal ṭangho buatsaih a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram