Comptroller and Auditor General of India audit report thar berah chuan Rashtriya Madhyamik Shiksha Abhiyan (RMSA) kalpui danah Mizoramah thil felhlel a awm nual avangin ruahman anga tihpuitlin loh a ni.
Ningani a chief minister Zoramthanga’n assembly dawhkana a chhawpchhuah CAG Report-ah hian RMSA thiltum tarlangin kum 2017 kha mitin thleng phaka secondary education chhawp hnaih tih a ni a. Chutiang a nih lai chuan Mizorama kum 10 zet RMSA kalpui a nih tawh hnu-ah khaw awm zawng zawng 853 zinga khaw 392-ah secondary school a la awm ta lova, hei hi za zela 46 zet a ni. School Education department hian zir chianna engmah a neih loh avangin secondary school awmna khua a zirlai awm zat pawh an hre lo niin CAG report chuan a sawi a. Chubakah chuan a ṭul dan zir chiang hmasa lova in an sak tam tak chu hman ṭangkai lohvin a awm a, chu’ng zingah chuan Government Bawngkawn High School-a Art and Craft Room te, Government Ch. Chhunga High School a Library room te, Kulikawn High School a building ṭha ang reng tak sakte leh Government KVM High School a Classroom tur an sak zawh tawhte a tel a ni.
RMSA hnuaiah hian laboratory assistant 58 lak a ni a, mahse, an thawhna tur sikul building an la sak zawh loh avangin hun rei tak hna thawk thei lovin an awm a. Hnathawhna hmun tur nei lova laboratory assistant 58 lai lo lak lawk an nih avang hian an hlawh leh a behbawma cheng nuai 208 leh sing 8 chu sen thlawn a ni. Ministry of Human Resources-in kum 2014 a kaihhruaina a siam angin sikul thuneitute hian an sikul ṭheuhah tui thianghlim pekna tur an ruahman tur a ni tih a ni a. Auditor-te’n sikul 92 zinga 15 an endik-ah sikul 10 chuan tui thianghlim in tur an nei lova, ruahtui dawhkhawl sawngbawl thianghlim loh an in avangin zirlai leh zirtirtute hriselna chu dinhmun hlauhawmah a awm a ni.
Mizoramah hian naupang enkawl uluk ngai bikte zirtir turin special educator 42 lak a ni a. Sikul 309 dinhmun endiknaah sikul 53 chuan hetianga enkawl uluk ngai bik hi 5 aia tam kumtin an nei tih hmuhchhuah a ni. Chuti chung chuan special educator 26-te chu naupang enkawl uluk ngaite zirtir hna thawhtir lova pisa lama chhawr daih an ni a. Sikul sak thar 15 zinga 9-ah chuan hetiang zirlai enkawl uluk ngaite kalna tur bik hi siam lovin inchhawng-ah te pawh rahka-ah an kal ve mai a ṭul a ni tiin report chuan a tarlang. Secondary School 15 endiknaah chuan nikum March thla thleng khan a eng sikul mah hi information and communication technology hnuaia thuam an la ni lova. Computer dahna tur pindante chu siam ni ve bawk mahse computer, printer leh internet thlun zawm engmah a awm lo a ni.
Hetianga RMSA kalpui a nih chhan hi sikul tin mamawh dan khawn khawm behchhana ruahmanna siam a nih ṭhin loh vang leh hnathawh dan vil zui a endik a nih ṭhin loh vang niin CAG report-ah hian an tarlang a ni.