Kan rama tih ve atana tha rawtnaten bawhzui leh ngaihsak zui a hlawh lo thin hle a ni:MJA President

Mizoram Jour-nalist’s Association (MJA) Gen. Hqrs. President, Zonun-sanga Khiangte chuan, “Journalist-ten Study Tour an neihna hmuna kan rama tih ve atana ṭha nia kan hriat kan sawi leh rawtna kan thlente hian bawhzui leh ngaihsak a hlawh thui lo ṭhin hle a ni,” a ti.

Tunhnaia Chennai/Pudu-cherry-a Press Study Tour neia kal Mizoram Journalist’ Association member-te chuan nimin khan Aizawl Press Club Conference Hall-ah zin report an pe a, he hunah hian MJA president, Zonunsanga Khiangte chuan, “Study Tour-a kalte report aṭangin Mizorama kan sawrkarin tih ve theih reng tur a neihte kan lo tih loh a awm tih a lang,” a ti a, “BADP sum ngei pawh hi tourist hipna atan hmang ṭangkai theih a ni tih state dangah kan hmu a ni,” a ti.

MJA President chuan Mizorama accredited journalist-ten sawrkar aṭanga facility an dawn chu a tam lovin, a beitham hle nia sawiin, hemi kawngah pawh hian sual-chhuah ve ṭul te pawh a awm nia a lan thu a sawi a. Journalist-te tan Mizoram sawrkarin Press Study Tour leh training a buatsaihsak ṭhin leh hmachhawp la awm mekte chu lawmawm a tih thu a sawi bawk.

Mizoram sawrkar Information & Public Relations Department bultumin MJA member-te tan Press Study Tour chhawng 4-a buatsaih turin ruahmanna siam a ni a, a chhuak hmasa ber hian November 9-15, 2019 chhung khan Chennai leh Puducherry an tlawh a, he team-a MJA aṭanga hruaitu, A.Zotinkhuma chuan Union Territory zing ami Puducherry-a I&PR hotute leh Tourism department hotute nen an inkawm dan a sawi a. Kum 2003 aṭangin journalist kum 58 tling tawh, kum 20 chhung eizawnna atana lo hmang tawhte hnenah thla tin Rs.7,500/- pek an nih thu te, journalist pension dawng vanduaina tawka thite chu an nupui fanaute hnenah thla tin an pension aṭanga a chanve3,750/- pek an nih thu te an lo hrilh tih a sawi a.

Heng bakah hian Pudu-cherry sawrkar hian an state chhunga accredited journalist-te hnenah laptop emaw smart phone emaw lei nan `12,000/- an tumsak thu leh a bak chu he puihna dawngtu journalist chuan ama sum aṭanga a tum belh thu te an lo hrilh a ni.

Tourism chungchangah a hlawhtlinna turin zau taka hma lak aiin mahni ram mila kalna leh hawi bik neih chu a fuh ber nia an hriat thu Tourism hotute hian an lo hrilh a, anni pawhin hmalakna felfai tak insawr bingna an neih thu an lo hrilh thu sawiin, Puducherry Tourism director sawi danin an ram sq. km 492-ah hian kumtin ramdang aṭangin tourist 150000 an nei ziaha chhut a ni a, ram chhung atangin nuai 15 vel nei ziah anga chhut theih a ni bawk. Tourism hi an sawrkar sum lakluhna hnar tha tak pakhat a nih thu a sawi a, kum khatah Tourism department budget hi cheng vaibelchhe 50 a nih laiin cheng vaibelchhe 400 chuang kumtin sawrkarah revenue an chhunglut thung niin a sawi.

He Press Study Tour-a I&PR Departmengt aṭanga kal Andrew H.Lalremruata, IPRO chuan an zinnaa sawrkar aiawh-te an kawmna leh an thil tlawh-te aṭanga Mizoram tana ṭangkai tur nia a hriat te a sawi bakah he tour-a tel MJA member dang-ten report an pe bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram