Categories
Chanchinthar Mizoram

MTDA-ten buhfai phurh loh tum

Mizoram Truck Drivers’ Association (MTDA) chuan Buhfai phurh hmasak dan tur indawt (serial) kalpui chu an kuta dah a nih leh hma loh chuan buhfai an phurh dawn loh thu an sawi.

MTDA Gen.Hqrs, Aizawl chuan thuchhuah siamin, FCI aṭanga State sawrkar-in alei Buhfai chu tun dinhmunah vawiin (ni 29.11.2019) aṭangin an phurhpui thei rih dawn lo tih an sawi a, hemiin a nghawng Mizo mipui tehriatthiamna leh ngaihdamna an dil thu an sawi a ni.

MTDA chuan nimina thuchhuah an siamah chuan tun hma, ṭhangkhatlian hmalam aṭang tawh khan Motor lian khalha eizawngte chuan buhfai phurh chu eizawnnan ber an lo hmang tawh tih sawiin, an hruaitu hmasate chuan ni 5 November, 1994 khan MTDA chu Bairabi Rail Staition-ah an din tih an sawi a.

MTDA chuan Buhfai load hmasak dan tur indawt dan (serial)-te dahin he serial hi an lo kalpui a, ṭha taka an kalpui laiin kum 2006 khan Mizoram Carrying Contractor Associationl (MCCA) chuan engemaw chhuanlam siamin MTDA-ten serial an enkawllai chu an laksak tih an sawi a, amaherawhchu MCCA-te an chhungkuaah leh serial enkawlnaah hian fello leh hnawk tamtak a awm avangin rei pawh an enkawl thei lova, khatihlaia Chief Minister Lal Thanhawla chuan serial enkawl phalna chu MTDA kutah a pe leh ta niin an sawi.

Nikum hmasa hun engemaw lai vel aṭang khan MCCA leh MTDA te inkarah hian buaina neuh neuh a chhuak leh zeuh zeuh ṭhin tih MTDA chuan an sawi a, mahse FCS&CA Dept. hmalakna leh MCCA leh MTDA ten dawhkan kil-in an sawifel leh mai ṭhin bawk a, buaina neuh neuh karah MTDA chuan serial chu enkawl zelin, serial dah man hi member-ah `100 an la a, chu chu an pawl intun nunna ber a ni tih an sawi a.

MCCA chuan MTDA serial enkawl chungchangah an lungawi lohna Director, FCS&CA.Dept.ah thlenin, Director pawh hian vawi engemaw zat meetting hi MTDA leh MCCA te a neihpui a, tichuan June 2019 khan Minister, FCS&CA Chamber-ah FCS&CA Dept. Officers meetting chuan serial enkawl chu MTDA kuta dah lehin Director pawhin order a chhuah leh ta tih an sawi.

MTDA-ten ngaihṭha taka serial an enkawl laiin Serial enkawl phalna petu FCS&CA Dept leh MTDA chu Guwahati High Court, Aizawl Bench-ah MCCA chuan an khing ta thut tih an sawi a, hei hi MTDA chuan a hrethiam lo tih an sawi a, serial enkawl loh ringawt chu MTDA-te lungawi lohna a ni lo tih sawiin, MTDA-in serial a enkawl chu mihausa leh retheite hrutrualtu a ni tih an sawi a, mihausa, MCCA-ten serial an enkawl lai chuan nitina inhlawhfa motor-in phurh tur an nei lova, tunah pawh hian serial hi midang enkawl a nih chuan MTDA member 600/700 vel chu eitur nei lova nghei mai thei dinhmuna ding an nih avangin MTDA in serial an enkawl leh hma loh chuan buhfai an phurhpui thei dawn lo tih an sawi a, hemiin a nghawng mipui zawng zawng hnenah ngaihdam an dil thu leh thupha an chawi thu an sawi a ni.

By Editor

C.Lalrochhuanga,
New Serchhip, Serchhip - 796181
Mizoram
Contact: WhatsApp | Phone Call | Telegram

Leave a Reply

This site uses Akismet to reduce spam. Learn how your comment data is processed.