Ramchhung hmun dang rualin Governor hovin Aizawl-ah Constitution Day hmang

Ramin Danpui a neih ṭan ni champha, Constitution Day chu nimin khan ram chhung hmun dangte rualin Aizawl Vanapa Hall-ah Governor PS Sreedharan Pillai-a hovin lawm a ni a.

Governor chuan ram Danpui chhungah hian ram chhunga thuneihna tawp chu mipuite kutah a awm tih chiang taka inziak avangin Danpui hnuaia inkaihruainate hi khua leh tuiten an zawmin an zah tur a ni, a ti a. India Danpui chu khawvela Dân bu sei ber pawl, Dan bu danglam bik leh pawimawh bik, Democracy inrelbawlna hnuaia khawvela ram lian ber dawttu chhunga cheng mipuite hnena thuneih-na pumhlum petu a ni a. Constitution siamtute zingah khan India ram bung tina chêngte aiawh an tel vek avangin India khua leh tui zawng zawngte he Danpui siamnaah hian an tel vek a ni, a ti a. Danpui chhunga pawimawh ber pahnih chu khua leh tuite chanvo, dikna leh zalenna, Fundamental Rights leh khua leh tui nihna anga tih tur, Fundamental Duties te a ni a, Fundamental Rights hriaa pawm a, ngaihhlut a pawi-mawh tluk zetin Fundamental Duties hnuaia khua leh tuite mawhphurhna leh tihturte zawma dah pawimawh chu khua leh tuite mawhphurna a ni, ti a.

Governor chuan Danpui neih champha lawm ni-ah hian khua leh tui zawng zawng, a bik-in mipui rawngbawla sawrkar hna thawk zawng zawngten ṭha-hnemngai taka an mawhphurh-nate hlen chu an tih tur a ni tih an inhriatnawntir leh tih sawiin, ram hmasawnna tura hna-thawhna kawnga hmachhawn tur leh paltlang tur tam tak a awm tih hriat thar a ṭul tih a sawi a. Ram hmasawnna tur te, a chhunga chengte inpum-khatna kawngah leh khua leh tuite chanvo dik tak pek chhuah kawngah te tan la thar turin kalkhawmte a chah a ni.

Law Minister TJ Lalnuntluanga pawhin Constitution Day hman a ni chu lawmawm a tih thu sawiin, India Danpui chu Mizote tan a pawimawh zual bik a, Mizo hnam pasalṭhate leh India sawrkar inremna angin Mizote pual liau liauin India Danpui Article 371G-ah an inrelbawl dan tur a inziak a, India Danpui hnuaiah Mizote chu ṭha taka humhalh an ni, a ti.

Constitution Day puala inkhawm hi Chief Secretary Lalnunmawia Chuaungo -in kaihruaiin ‘The Preamble of Constitution of India’ chhiar rualna hun a kaihruai nghal bawk.

Programme bulṭannaah ram Danpui siam a nih dan Video Clip, I&PR Deptt. siam chu thlirho a ni a, Constitution of India chungchang Dr. H.Lalzuithangi’n a sawi a ni.

Constitution Day pual hian All India Radio Aizawl News Unit pawhin ram tana inhlan thar tura thutiam an chham rual a ni.

Ramin zalenna a neih tirh khan ram Danpui hi neih nghal a ni lova, member 299 awmna, Constituent Assembly-in Danpui siam hna hi a thawk a, ni 165 chhungin vawi 11 an ṭhukhawm hman a. A remkhawm leh siamrem hna thawk turin Father of the Constitution of India tia koh, Dr. BR Ambekar Chairman-na hnuaiah August ni 29, 1947 khan Drafting Committee din a ni a. November ni 26, 1949 khan Constituent Assembly ṭhutkhawmah lungrual takin pawm a ni a. January ni 26, 1950 khan ram Danpui chu hman ṭan a lo ni ta a. Danpui hi Part 22-ah ṭhen a ni a, Article 395 a awm a, Schedule 12 leh appendices 5 awmin, vawi 103 siam ṭhat, siam belh leh tihdanglam a ni tawh a ni.