Categories
Chanchinthar Mizoram

Rengtekawn – Builum kawng siam meka lung hman tha tawklo ti

Kolasib Rengtekawn aṭanga Builum panna kawng, Pradhan Mantri Gram Sadak Yajona (PMGSY) sum hmanga siam mek chu an lung hman a ṭha tawk lo tih thu an dawn bawhzuiin Kolasib District MJA chuan nimin khan a hmunah an enfiah a, an lung hman tur hi PWD pawm theih chin nimahse duhthu a sam tawk lo tih an finfiah.

Rengtekawn leh Builum inkar kawng hi KM 12.59-a thui a ni a, Contractor 4-in an thawk mek a, hna hi kumin September thlaa zawh tura tih nimahse contractor-te hian an zawh hman loh vek avangin nakum February leh May thla thlengte he hna thawh hun chhung pawhseisak an ni hlawm a ni.

Helai kawng siam meka Contractor-te’n Site Engineer atana an dah chuan kawng siam nan hian kawng kama Quarry-a lung an hmang a, Lung hi Water Absortion Test an neihah PWD-in a pawm theih chin chu zaa 50 a nih laiin zaa 46.8 a nih thu a sawi a. Lung an lak hi GSB atan an hmang dawn a, Concrete Pavement atan chuan hmun dang atangin lung an la dawn tih Kolasib MJA te hi hrilhin, an kawng laihah hian zangnadawmna phût an awm avangin hmun thenkhatah a zauh tur anga zau tling thei lo a awm nual thu a sawi bawk.

MJA Kolasib hruaitute chuan PMGSY sum hmanga kawng chu siam a nih avangin a a enkawl zuinaah State sum hman a ngaih tawh dawn avangin ṭha leh uluk taka siam chu an duhdan a nih thu an sawi a. Kawng ṭha a awm theihna tur a nih chuan an hnathawh chu an enfiah fo tur thu pawh sawiin, hmanraw ṭha lo hmang lo turin an ngen a ni.

By Editor

C.Lalrochhuanga,
New Serchhip, Serchhip - 796181
Mizoram
Contact: WhatsApp | Phone Call | Telegram