Vairengtea arsa zuarte anmahni ngeia ar vulh ve turin duh

All Mizoram Poultry Farmers Association (AMPFA) chuan Vairengte Arsa zuarte chu State pawn aṭanga arsa lalut lova, anmahni ngeiin ar vulh ve tura an duh thu leh Mizoram chu arsa thianghlima a intodelh theih nana hma la ve tura an duh thu an sawi.

Nimin khan AMPFA hian Aizawl Press Club-ah chanchinthar lakhawmtute kawmin, Mizoram chu state dang aṭanga arsa lakluh ngai lova, arsa thianghlima intodelhtir an tum ber a ni tih an sawi a, Chutiang tur chuan Trade & Commerce Department-te nen thawkhovin, Trade & Commerce Department kaihhruainain New Market-a Arsa zuar Association-te nen pawh Co-ordination Committee an nei ṭhin tih an sawi a, he Committee-ah hian Vairengte Arsa Zuar Association pawh koh tel ṭhin an ni chungin an tana hlawkna thil a ni dawn lova an hriat chuan an lo kal duh ṭhin lo tih an sawi.

AMPFA chuan Vairengte Arsa Zuarho chuan Ar an vulh ve nia an insawi avangin Spot Verification zuk neih a ni tih an sawi a, eizawn nana hmang ar vulh an awm loh zia finfiah a nih thu sawiin, Assam ram chhung Noksa hmunah an vulh nia an insawi lehzel avangin fianfiah zui zel a ni a, helai hmun pawh hi hnam dangho ar vulhna hmun a ni tih finfiah a ni tiin AMPFA chuan an sawi bawk. AMPFA chuan Mizoram khaw hrang hranga ar vulha eizawng intelkhawm an nih thu an sawi a, an pawlah chuan ar vulha eizawng chhungkua 1220 registration tia inziaklut an awm mek thu an sawi a, registration ti lo Ar vulhtu chhungkaw engemaw zat an la awm bawk niin an sawi a, an pawl thiltum pathum te chu Mizoram hi ar-a intodelh tir tihte, mipuiten arsa thianghlim leh thar ṭha tak an lei leh ei theih nana hmalak leh ar vulh chu eizawnna tlaka siam te a ni, an ti.

Hetihlai hian tunhnai khan Vairengtea Arsa Zuar Association ten Aizawl leh hmun hrang hranga pek darh tura ar puahsa maxicab-a an thawn chu Aizawl thlen hmain mi tuten emaw lo hlanthlaksakin bawlhhlawh paihnaah an paihsak nia sawi a ni a, hemi chungchangah leh he thu kal zelah hian Pathianni khan Vairengte khawtlang hruaitu All NGO leh Joint VCte chuan meeting neiin, an arsa man an hmuh lêt theih nan leh a ṭul anga na zawka hmalakho zel nise, an ti a.

He thil thleng chungchangah hian ni 16.11.19 khan Vairengte Arsa zuar hruaitute chu Aizawlah kalin a hmunah thil thlen dan an ngaihven a, anni hi Vairengte Welfare Committee, Aizawl hruaitute leh bialtu MLA Lalrinsanga Ralteten lo buaipuiin, FIR pawh thehluh ṭhat leh a ni a. Hemi tlai lam hian AMPFA hruaitu mi 13 lai chu Bawngkawn Police-ten thu zawhfiah turin an la a, mahse an mi man te hi hemi zan vek hian chhuah leh nghal an ni.

Leave a Reply

This site uses Akismet to reduce spam. Learn how your comment data is processed.