Nimin khan Aizawl Mualpuiah sipai lâk runpui, Indian Army Rally 2019 chu neih ṭan a ni a, Dr. Vanlalṭanpuia, Chairman, Mizoram Youth Commission (MYC) chuan nimin zingkar khan he sipai lâk runpui ṭanna hun hi a hmanpui a ni.
MYC Chairman Dr Vanlalṭanpuia chuan, tuna Indian Army lak tur hna hrang hrang hi Mizoram ṭhalaite tan pawha hna nghet leh hna tha tak a nih avangin MYC chuan a ngai pawimawh hle tih a sawi a, hemi atana Mizoram ṭhalaite an tlin tam theih nan tiin MYC chuan kum 2019-ah pawh Assam Rifles nen Aizawl, Lunglei leh Siahaahte bakah Vairengteah CIJWS nen thawkdunin Indian Army PreRecruitment Training a thlawnin an buatsaih tih a sawi a, ṭhalai mi 600 chuangin an zawm a, Mizoram tana post ruak zat hnawh khah vek a nih theih nan MYC chuan theihtawp an chhuah tih a sawi.
Aizawla Sipai Lak Runpui – Indian Army Rally 2019 atan hian Mizo ṭhalai mi 2753-in online registration an ti a, ni 18.11.2019-ah Aizawl District leh ni 19.11.2019-ah Aizawl District lo zawng tan Physical Test neih a ni ang a, heta tlingte hi ni 22.11.2019-ah Medical Test neih zawh fel a ni ang a, chuta tlingte chuan ni 19.1.2020-ah Written Test an nei leh dawn a ni.