ZPM Legislature party hming thlak dilnaah thutlukna la siam lo

Zoram Peoples Movement Legislature Party in an hming thlak an dil chungchangah Speaker chuan thutlukna a la siam hrih lo a, zirchian turin a la kawl a ni.

Assembly Speaker chuan ZPM MLA-te inhlawm-khawmna ZPM Legislature Party (ZLP) chu a tirah a pawm a, mahse ZPM hi political party a nih tak avang leh ZPM MLA-te chu inthlanna ah Independent anga an chuh vek avangin ZLP chu a din zel a rem tawh loh thu September 19, 2019 khan a hriattir a. ZPM hotu Lalduhoma MLA chuan ni 7.10.2019 khan Assembly Speaker hnenah lehkha thawnin ZPM Legislature Party chu awm chhunzawm tir turin a dil a, , mahse hemi hnu hian ZPM hian Speaker hnenah lehkha dang thehlut lehin an Legislature party hming chu tidanglamin ‘Zoram’ tih chu thlakin ‘Zo People’s Movement Legislature Party’ an invuah thu leh an Legislature party chu pawm tura ngenna an thlen nia thudawn a ni a, hemi chungchanga zawhna chhangin ZPM Legislature Party Secretary Dr. Vanlalthlana chuan an hming thlak an dil chungchangah Speaker aṭangin engmah chhânna an la dawng lo tih a sawi a.

Tuna hming thar an dilna hi hlawhtling ta lo se engtia hmalak zel nge an tum? tih zawhna chu, “Tuna legislature party hming thar kan dil hi political party hming anpui nei lo a ni a, a phal lo a nih chuan a dan behchhan kan zawt leh ang,” tiin a chhang a, Court-a kal an tum leh tum loh chungchang chu tun dinhmunah chuan an la sawi mai theih loh thu an sawi a ni.

ZPM Legislature Party hming thar pawm leh pawm loh chungchang chu Speaker thuneihna a nih thu Assembly Secretariat thawktute chuan an sawi a a. Zoram Peoples Movement chu political party a nih tawh avang leh tuna ZPM MLA ni mek te chu Independent a ding vek an nih avangin an tan ZPM anga hming vuah chu dan aṭanga thlirin a rem lo a. Mahse hming thar an invuah chuan a remlohna awm lo turah an ngai tih an sawi a. Naktuk aṭanga Assembly session neih turah pawh MLA te thutna tur chu tih danglam a la awm lo niin hriat a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram