Categories
Chanchinthar Mizoram Politics

MGNREGS hlawh Krismas hma ngeia pe turin phût

Mizoram Pradesh Congress Committee chuan Inrinni khan thuchhuah siamin MNF sawrkar chu sum enkawl thiam lovah an puh a, Krismas hma ngeiin ni za inhlawhna – Mahatma Gandhi National Rural Employment Guarantee Scheme (MGNREGS) sum chu a dawng turte hnenah pe turin an phût.

MPCC thuchhuah hian a tarlan danin Khawzawlah August thla aṭangin MGNREGS hlawh hi an la mumal tawh lo a, Khawzawl-ah hian Job Card 2670 awmin MNF sawrkarin Khawzawl mipui sum, mipui nawlpui inhlawhna cheng nuai tam tak a ba mek a, hetiang zat zet an bat lai hian district thar lawmna atan job card neite chu an ni khat hlawh ṭheuh thawhtir an ni, tiin an tarlang.

Ngopa RD Block hnuaia mite pawhin September leh October thla chhunga an inhlawhnate vawiin thlengin an la thei lo niin an sawi a, Thingdawl RD Block hnuaia khaw ṭhenkhat pawhin August thla aṭangin MGNREGS hlawh hi an la thei tawh lo niin an tarlang bawk.

MPCC chuan MNF sawrkar chu sum leh pai enkawlna lamah a talbuai nasa hle niin an sawi a, state sawrkar sum lakluh vena tur leh thawhchhuah vena tur lam an ngaihthah a, thawhchhuah tam ai chuan central aṭanga a awmsa dilchhuah tam lamah ṭan lak an tum a, kutdawh sawrkara insiam an tum a ni ber, tiin an tarlang a. An tum anga pawisa an dilchhuah theih mai loh avang leh, lakluhna dang nei si lova a awmsa an hman zawh zel avangin an talbuai chho ta nia sawiin, contractor-te hnathawhna bill tam tak an pek theih tawh loh bakah sawrkar hnathawk pension tharte sum chhuahpui tur pawh an pe hlei thei lova, sawrkar Treasury hrang hrangah bill ba a tlingkhawm hnem em em a, thingtlang mipui nawlpuite inhlawh vena ni 100 inhlawhna thlengin MNF sawrkar chuan an ba ta zel niin an sawi.

MPCC chuan MNF sawrkarin MGNREGS hlawh a batsak thingtlang lama cheng chhungkaw sang tam takte chu an lainat tih an sawi a, Kristian-te hun pui ber, Krismas thlen hma ngeia MGNREGS hlawh hi mipuite hnena pek an nih ngei theih nana chak taka hma la turin MNF sawrkar an phut thu an sawi a, thingtlang lama chhungkaw sang tam takin MNF hotute intiam ang ngeia SEDP cheng nuai 3 dawn an inbeisei laia ni 100 Inhlawhna takngial pawh thla engemaw-zat an batsak nachhan chu sawifiah ngei turin MNF sawr-kar an phut tih an sawi bawk.

By Editor

C.Lalrochhuanga,
New Serchhip, Serchhip - 796181
Mizoram
Contact: WhatsApp | Phone Call | Telegram