Lawrkhawm (4.12.2019)

DC sawn
@ Nimin khan Mizoram sawrkar chuan MCS Officer engemawzat awmna hmun a siksawi a, heng zingah hian Serchhip District Bawrhsap ni lai Sangchhin Chinzah pawh telin, Kolasib DC tura sawn a ni a, Serchhip District Bawrhsap tur hian Addl. Secretary (Commerce & Industries, RD Department) V.Lalsangliana chu dah a ni a, Kolasib DC ni lai, Zoengsanga chu LAD Director tura sawn a ni.

Meizu man nei lo
@ Nimin khan Serchhip District Anti-tobacco squad chuan Chhiahtlanga sawrkar pisa leh zirna inahte dân bawhchhiaa puipunna leh sawrkar hmuna mei zu an awm leh awm loh an fangkual a, dân bawhchhia man tur an awm lova, dan bawhchhia man tur an awm lo hi Anti-Tobacco Squad-te chuan lawmawm an tih thu an sawi.

Tender Website
@ Mizoram State e-Governance Society (MSeGS) chuan Mizoram sawrkar department hrang hrangte leh a hnuaia Public Sector Undertakings (PSU) Board, Corporation leh Society-te hman turin ‘Tender Website’ tender.mizoram.gov.in a siam thar a, hei hi 24×7-a mipuiten sawrkar hnuaia Tender, Quotation leh Expression of Interest (Eol) te Website kaltlanga Online a an en theihna tur a ni a, tunah hian hman theiha peih a ni tawh a ni. He website hi mipui ten ṭangkai taka hmang turin MSeGS chuan a sawm a, Mizoram Sawrkar hnuaia Department hrang hrangte leh a hnuaia PSU Board, Corporation leh Society-te pawhin hmang ṭangkai ṭheuh turin a sawm a ni.

Thlalatute zin
@ Information & Public Relations Department bultumin Mizo Thlalatu Pawl, Mizo Photographers Society member 10-te chuan Mizo History-a hmun pawimawhte fang turin nimin zing khan Aizawl an chhuahsan a, I&PR Department Director, Lallianpuii’n an Department Office aṭangin a vailiam.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram