Mizoram Presbyterian Kohhrana rorelna sang ber, Synod Inkhawmpui vawi 96-na chu nizan aṭang khan ‘Biakinpui’ tia vuah, Mission Veng Kohhran Biak Inah ṭan a ni ta.
Nizan kha ‘Inlawmna leh Report’ inkhawm a ni a, Moderator ni lai Rev. R Lalhming-thanga’n a kaihruai a. Vawiin chawhma dar 9:30 aṭangin rorel inkhawm ṭan a ni ang a, Moderator thar Rev. R. Lalchang-liana’n a kaihruai ang a, tun kar Inrinni thleng rorel a ni ang a, zan lamah vantlang Pathian biak inkhawm a awm ṭhin dawn thung.
Pathianni chawhma inkhawmah pastor nemngheh a nih dawn bakah, probationary pastor atana lak tharte dahngheh an ni dawn a, chawhnuah Moderator-in Lalpa Zanriah Sakramen a ṭheh ang a, zanah Moderator kal chhuak Rev. R.Lalhming-thanga’n thuchah a sawi ang.
Tun ṭum Synod Inkhawm-puia thlarau lam thupui chu ‘Nang malsawmna ni ang che’ (Genesis 12:2) a ni a, he thupui hi Inrinni zan inkhawmah Rev. Vanlalnunmawia Zawngte, Kolasib Hmar Veng-in a sawi dawn a ni.
Synod Inkhawmpui hi kum 2010 aṭangin kohhran malin thleng lovin, pastor bialin an thleng ṭhin a, kuminah hian Mission Veng Pastor Bial-in thlengin, Mission Veng Kohhranah nghah a ni a. Kumina inkhawmpuiah hian palai 2,300 vel awm tura ngaih a ni.
Mission Veng Kohhranah hian Synod Inkhawmpui vawi 35 nghah a lo ni tawh a, tun ṭum hi vawi 36 an thlenna tur a ni.