District Bawrhsapin damdawi in tlawh

Nimin khan Serchhip District Bawrhsap Dr. Lalzirmawia Chhangte, IAS, chuan Serchhip District Hospital (JN Hospital) a tlawh a, thawktute nen a hmunhmate fang kualin an dinhmun leh mamawh an neih te a ensak.

District Bawrhsap hi District Medical Superintendent Dr. ZD Lalmuanawma chuan lo dawngsawngin Hospital chhunga room hrang hrangte a enkualpui a, Laboratory leh Labour Room-te, Ward hrang hrang leh Cabin-te, Casualty Room leh Eye clinic-te enin, mamawh zualpui an neih mekte pawh a zawtfiah a ni.

Dr. Lalzirmawia Chhangte chuan hriselna hi mitin tan rohlu a nih avangin mipuite kan dama kan hrisel zel theih nana hnathawhna hmunpui, kan Hospital-te chu ṭha taka kalpui a ṭul tih a sawi a, Serchhip District Hospital-in hmanrua ṭha tak tak a nei chu lawmawm a tih thu sawiin, mamawh la awmte pawh a theih anga ngaihtuah tlan ṭha a tih thu a sawi a, thawktute pawh indaihlo chung chunga theihtawp an chhuah ṭhinnaah lawmthu a sawi a. Rawng-bawlna pawimawh tak an thawk a ni tih hrereng turin a chah a ni.

District Bawrhsap-in Hospital a tlawh hi Dr. Laldawngliana Sailo, CMO, Dr Lalhlunpuii, DIO, K.Saitluanga, DIPRO leh media mi-ten an ṭawiawm a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram