Zothlifim Logo
Loading ...

Sawrkar laipui, Ministry of Human Resource Development chuan Mizoram-in hunrei tak alo nghah tawh, Lungleia Mizoram University, Southern Campus hawn phal-na Mizoram hnenah a pe ta.

Higher & Technical Education Minister Dr R Lalthangliana chuan New Delhi-ah Ministry of Human Resource Development-a Joint Secretary, JC Hosur hmuin kum 10 chuang zet MZU Southern Campus din theih nana sawrkar laipuia Mizoram Vice Chancellor leh mi ṭhahnemngaite thlen tawh ṭhinna leh Mizoram sawrkar Chief Minister Zoramthanga pawhin sawrkar laipuia a lo a thlen tawh chu bawhzuiin, MZU Southern Campus din phalsakna Approval Letter a lo tihchhuah sak niin sawrkar thuchhuah chuan a tarlang.

HRD-in MZU Southern campus din phalna lehkha MZU Vice Chancellor hnena ziah ang chuan, Mizoram sawrkarin University campus tur ram a thlâwnin a pek a ngai a, ram neih a nih hunah University-in hma a la chhunzawm dawn a, HRD chuan Lungleia University hmun tur lo enthlithlai turin MZU VC hi a hriattir nghal bawk a ni.

Hemi chungchangah hian Higher and Technical Education Minister Dr. R. Lalthangliana chuan MZU Southern Campus din anih theihnana hma lo la tawh tu zawng zawng chungah lawm thu a sawi a ni.

Health & Family Welfare Department changtu ni bawk, Dr. R.Lalthangliana hian Tribal Affairs Minister Arjun Munda leh Renuka Singh Saruta, Minister of State, Tribal Affairs-te chu an pisa-ah hmu leh nghalin Zoram Medical Collefe-a medical zirlaite tana Boys’ and Girls’ Hostel sakna tur ngaihtuahpui turin Tribal Affairs Minister pahnihte hnenah hian a sawi a, hemi chungchanga Mizoram Chief Minister-in lehkha a ziah tawhte thai langin, a ngenna ngai pawimawh turin a thlen nghal bawk a ni. Tribal Affairs Minister pahnihte hnenah hian Mizoram in Health & Family Welfare leh Higher & Technical lama Infrastructure, a bika Mizoram in a mamawh hrang hrangte a thlen chu ngaihtuahpui rang turin a ngen bawk a ni.

Minister Dr. R.Lalthangliana hian, Dr.Vinod K.Paul, Member, NITI Institution for Transforming India Committee-a Health & FW leh Higher Education changtu leh Medical Council of India Chairman ni lai hmu nghal bawkin Mizoram mamawh hrang hrang- Zoram Medical College, Health leh Higher Education tih changtlun nana Infrastructure mamawh zual te a thlen a. Dr. Vinod K. Paul hian NITI Aayog Member anihna anga, a hnena ziaka thehlut turin Minister hi thurawn a lo pek bakah theihtawp a lo chhuahpui tur thu a hrilh bawk a ni.

Dr. R.Lalthangliana hian Kamini Chauhan Rattan, Joint Secretary (Higher Education), Ministry of Human Resource Development leh official dangte hmu nghalin, Mizoram a RUSA kalpui zel dan tur a sawipuii bawk a, RUSA Project III lo awm leh tur, tun Financial Year, April ni 1, 2020 aṭanga ṭan turah a bikin Mizoramin a mamawh em em, College tihchangtlunna infrastructure hrang hrangte tihhlawhtlin ngei theih nise tih chu a thlen bawk a ni.