Mizoram Police Raising Day 2020 pualin thisen pe

Vawiina Mizoram Police Raising Day 2020 lawm tur pualin Mizoram Police chuan special programme hrang hrang a buatsaih a, Police unit hrang hrangin mahni remchan dan ang zelin hemi pual hian Voluntary Blood Donation Camp an buatsaih a, thisen Unit 142 an pe tawh a, Serchhipa Police-te pawhin nimin khan Serchhip damdawi ina dah turin a thlawnin thisen an pe a ni.

Serchhip Police-te hian thisen unit 17 an pe a, thisen petute hi mipa 16 leh hmeichhia 1 niin, Serchhip District Superintendent of Police R.Sathiya-sundaram bakah Addl SP PC Lalṭanpuia, Victor Zothan-sanga, SDPO leh Ramfang-zauva, Dy.SP (Hqrs)-ten an ṭawiawm a ni.

Mizoram Police Raising Day 2020 pual hian January ni 15 aṭang khan programme hrang hrang an lo hmang chho tawh a, nimin pawh khan Vanapa Hall-ah Mizoram Police ralthuam leh hmanraw phochhuahna hun hman a nih bakah nimin vek khan “Drug Trafficking & Abuse in Mizoram : Way Forward” tih thupui hmangin Vanapa Hall-ah seminar an buatsaih a, nimin vek khan Vanapa Hall-ah hian Cultural Programme an hmang bawk a, he hun hi Mizoram Assembly Speaker Lalrinliana Sailo chu khuallian niin a hmanpui a ni.

Mizoram District hrang hranga DEF leh Battalion te chu Zone 8-ah ṭhen niin, heng zone hrang hrangte hian Mizoram Police Raising Day pual hian inelna hrang hrang an nei a, Football Tournament-ah Serchhip DEF (Zone-III) chu an champion a, mal zaiah Vanlalhriatchhungi, Thenzawl PS chu pakhatna a ni bawk a, hei bakah hian Shooting Competition pawh an nei a, Middile School leh High School tan Painting Competition an buatsaih bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram