February ni 13-16, 2020 chhunga Serchhipin a thlen tur, Paragliding Accuracy World Cup 2020 chu ‘2020 International Paragliding Accuracy Championship, Mizoram India’ tiin a hming thlak a ni.
Hetianga hmingthlak a nih chhan, a hmaa he event pawmpuitu, Paragliding Accuracy World Cup (PGAWC) website-a tarlan a nih dan chuan PGAWC-in he world cup atana official a ruahman dan chu India-a National Aero Council (NAC) chuan ring lovin anmahni puala official team an din avangin he event hi Paragliding Accuracy World Cup atan an pawmpui theih loh thu leh heta point pawh world cup point anga chhiar a nih dawn loh thu an tarlang a ni.
Hetihlai hian he event hi a hming thlakin ‘2020 International Paragliding Accuracy Championship, Mizoram India’ tia kalpui zui a ni dawn tho a, hei hi khawvela boruaka infiamna hrang hrang enkawl-tu, Fédération Aéronautique Internationale (FAI) chuan Category-II-ah a la pawmpui zui zel dawn thung a ni.
He event thleng tur hian Mizoram Aero Sports Association (MASA) pawh ngawrh takin an la inbuatsaih chhun-zawm zel a, event hming thlak a nih chungchangah pawh a hmingah ‘world cup’ tih tel lo mahse tuna Serchhipin a thlen tur chu danglamna a awm loh thu leh pilot-te point hmuh theih zat pawh a la inan thu an sawi a, a hlut dan a ngai reng niin an sawi.
He event-a tel tur pilot inziahluh (registration) hi PGAWC-in a kalpui a, pilot 80 chuang an inziaklut hman a, mahse PGAWC an inhnuhdawk takah chuan pilot registration hi a bul aṭangin tihṭhat leh mek a ni a, nizan thleng khan mi 15 inziaklut an awm leh a ni.
Warning: Undefined variable $post in /home/lahj9ae7in9c/public_html/wp-content/themes/newsup/inc/ansar/hooks/hook-index-main.php on line 117