Paragliding Accuracy World Cup thlen turah inpeihfel hman beisei

Thla thar February-a Serchhipin Paragliding Accuracy World Cup a thlen tur atan chak taka inbuatsaihna kalpui mek zel niin a hun takah engkim peih hman beisei a ni.

Serchhip khua-in Paragliding Accuracy World Cup a thlen tur hi February ni 13 atanga ṭan tur niin February ni 11 khian he intihsiakna a tel tur leh Official te chu Serchhip rawn thleng hman tura beisei an ni a. He intihsiakna neihna tur hmun buatsaih hna pawh ngawrh taka thawh mek niin, nimin khan Mizoram Aero-Sports Association (MASA) Sub-Hqrs., Serchhip chuan helai hmunah hian hnatlang an nei a. Helai hmuna tui mamawh tur awlsam taka hmuh a nih theihna tura a thlang aṭanga tui pump chhoh dan tur an buaipui bakah thil pawimawh hrang hrangte an thawk a, an member thahnem tak an thawk chhuak a ni.

Para-Gliding Accuracy World Cup neihna tur atan hian Mizoram Rajya Sabha MP in sum a pek hmangin he intihsiakna chhimtute leh entute ṭhutna tur hmun siam hna chu thawh mek a ni a. Urban Development & Poverty Alleviation Department chuan Vantlang inthiarna siamin PHE Department in tui pek dan tur an buaipui mek a, a panna kawng pawh PWD ruahmanna hnuaiah siamṭhat tura ruahman mek niin Sailiamkawn atanga lirthei lut chho in chuanhnuai lama rawn chhuak thla tura ruahman a ni a, a panna kawng hi laih zauh hlek tum a nih bakah kawng chhuat ruallo te pawh siamrem tum a ni bawk a ni.

He intihsiakna neihna tur hmuna nikum lama phul chi an theh chu a ṭo theih loh avangin beisei angin a hmunhma tak hi siam theih a ni ta lo a, amaherawh chu building tul ang sak hna chu thawh mek niin helai hmuna hna thawktute chuan a hun takah hna hi zawh hman an beisei thu leh tuna building ruangam an siam zawh chuan remkhawm zung zung theih a nih dawn avangin a hun takah engkim peih hman an inbeisei thu an sawi a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram