STP-in him taka bawlhhlawh sawngbawl theih a nih loh chuan hmun dang zawng turin ngên

Serchhip Thalai Pawl (STP) chuan UD&PA Department-in New Serchhip ram, Tuikum lui hnâr lama bawlhhlawh sawngbawlna hmun an siam mek chu mihring tana him lo tur thil hrang hrangte pe chhuak lo tura bawlhhlawh sawngbawl theih a nih dawn loh chuan tawpsan a, hmun dang zawng mai turin thuneitute an ngên.

Nimina STP-ten thuchhuah an siamah chuan Serchhip khawpui tana New Serchhip rama bawlhhlawh sawngbawl-na din tur chungchangah nimin khan Vanthangpuii, District Urban Development Officer, UD&PA Department, Serchhip District chu a Office-ah an hmu tih tarlangin, DUDO hnenah hian Serchhip khawpui tana bawlhhlawh sawngbawl-na dinna tumna hmun hi Serchhip mipuite tui tlan lai, Tuikum lui-a PHE Department tuilâkna chhak / hnâr lama awm a nih avangin Serchhip mipuite tan a himlo thei em tih hriat tumin bawlhhlawh sawngbawl an tum dan an zawtfiah tih an tarlang a.

DUDO chuan bawlhhlawh sawngbawlna hmun thar dinna tur hian Serchhip VC hrang hrangte chu kokhawmin an ram chhungah hmun zawnpui turin an ngen hmasa tih a lo hrilh a, bawlhhlawh sawngbawlna hmun atana an kawhhmuh ṭhenkhatte chu a hmun a rem loh bakah a panna hla deuhte a nih avangin tuna an hmun hi an thlang ta niin a sawi a, tuna ruahmanna an neih dan chuan bawlhhlawh ṭawih thei chi chu leiṭhaah siam an tum tih a sawi a, hetihlai hian ṭawih theilo chi sawngbawlna tur ruahmanna a la awm rih loh thu leh ṭawih theilo chi bawlhhlawh sawngbawlna khâwl an neih hun tur a la hriat theih mai bik loh thu a sawi niin STP chuan an thuchhuah siamah chuan an sawi a, helai hmun hi a hma pawhin sawi neuh neuh a awm avangin hmun dang an zawn leh phawt tih DUDO hian a sawi a, amaherawhchu an duh ang hmun dang an hmuh theih mai loh avang leh helai ram bialtu VC-ten Tuikum lui a hlat tho nia an sawi avangin helai hmun hi leiin hma an la zui ta niin STP hruaitute hi a lo hrilh a ni.

STP chuan Serchhip khawpui tana bawlhhlawh sawngbawlna hmun ṭha zawk neih chu an duh thu leh ṭha pawh an tih thu an tarlang a, tuna bawlhhlawh sawngbawl-na hmun din meka bawlhhlawh ṭawih theite leiṭhaa siam chhuah a nih pawhin Serchhip mipuiten an ṭangkaipui ngei an beisei tih an sawi a. Hetihlai hian helai hmuna bawlhhlawh ṭawih theilo sawngbawlna tur ruahmanna a awm nghal loh avang hian Serchhip mipui bawlhhlawh thli-te chu Serchhip mipuite tui tlan mek, Tuikum luiah a luang lût thei dawn nia an ngaih thu an sawi a ni.

STP member-te chuan ni 11.1.2020 tlai khan bawlhhlawh sawngbawlna hmun siam mek hi an tlawh tawh tih an sawi a, google earth aṭanga an teh danin, he hmun leh Tuikum-a PHE Department tui lakna hmun inkar chu 3 kms vel bawr chauh a nih avangin, ruah a sur nasat phei chuan rang takin helaia bawlhhlawh thlite hi PHE Department tui lâkna hmun hi a thleng thuai thei dawn nia an ngaih thu an sawi a, PHE Department chuan an tui tihthianghlimnaah natna hrik chu that thei pawh nise, bawlhhlawhin tûr a pai hrang hrang tuia luang lûtte an thliar hran theih loh chuan Serchhip mipuiten tui thianghlim lo an tlân mai dawna an hriat thu an sawi a, chuvangin tuna ruahmanna awm mekah hi chuan helai hmuna bawlh-hlawh sawngbawlna din hi Serchhip mipuite tan a him rih lovah an ngai tih an sawi a, helaia bawlhhlawh sawngbawl-na hmunah hian mihringte tana himlo tur thil hrang hrang pe chhuak lo tura bawlhhlawhte sawng bawl theih a nih dawn loh chuan helai hmuna bawlhhlawh sawngbawlna din tura hmalak mekna hi tawpsana, hmun dang zawng mai turin thuneitute an ngen tih an sawi a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram