Nimin khan Chief Minister Zoramthanga chuan Mimbungah cheng nuai 45 senga sak, Sialkal Range Development Council Office thar a hawng.
SRDC office hawn lawm-na inkhawmah hian Chief Minister chuan Sialkal tlangdung khua tihhmasawnna tura ṭhahnemngai taka hma lo latu tawh zawng zawng chungah lawmthu sawiin, hmalak zelna tura pawh thawhhona ṭha neih a pawimawh thu a sawi.
Chief Minister chuan SRDC chu council puitling a hlan a nih theih nan theihtawpa sawrkarin hma a lakpui tur thu a sawi a. Buh a intodelh theih nan a leilet siamna tura hmalakpui tura an thlen pawh project siam tura chahin, sawrkarin lo bawhzuiin hma a lo lakpui zui tur thu a sawi a. Manipur nena inkalpawhna tur lei dawh ṭha zawk siama hmalak a nih tur thu te a sawi bawk a. Chief Minister chuan Higher Secondary School-te a ṭha tawklo tih sawrkarin hriatpuiin, kumtharah chuan theihtawpin puih dan a ngaihtuah tur thute, inkalpawhna kawng ṭha zawk siam turin SRDC area-ah chuan theihtawpa hmalak a nih tur thu sawi bawkin, SEDP kaltlanga thing theirah chi leh a dangte tihhmasawn tura hmalak tum a nih thu a sawi bawk.
SRDC member, Champhai North bialtu MLA Dr. ZR Thiamsanga chuan vantlang inkhawm hi kaihruaiin, Council Chairman L.Thangmawia, Lengteng MLA chuan SRDC fund chu sum siamna rem-chang atana hman chi a nih loh thu leh hmalakna te chu party emaw zarzo tuma ṭangkai pui tum chi a nih loh thu a sawi bawk.
He hunah hian “Profile & Achievement of Sialkal Range Development Council” lehkhabu chu Chief Minister hian a tlangzarh nghal a ni.
He inkhawmah hian Saitual, Khawzawl, Champhai leh Aizawl atangin official engemawzat leh Manipur aṭangte in an kal a. Mimbung VCP Dampau Guite, Zomi Council Gen. Hqrs Speaker Dr. R.Sanga leh midangten thu an sawi a, Ngopa BDO Lalhruai-tluangi hnen atangin SRDC din a nih chhoh dan leh hmalakna lo awm tawh tlangpui report ngaihthlak a ni bawk.
Council office building sakna ram zau zawng hi 3250 sqm a ni a. RCC structure niin chhawng thum a sak a ni a, Chairman leh Vice Chairman office bakah Conference room, establishment room, staff room leh garage te a awm a ni.
SRDC hian Lengteng leh Champhai North Assembly Constituency a khaw 6 – Mimbung, Hrianghmun, Teikhang, Kawlbem, Selam leh Vaikhawtlang te huamin February ni 24, 2012 khan development board a din a ni a, Council (SRDC) ah September ni 24, 2013 khan thlak a ni.