Briton boxing promoter, Frank Warren chuan Tyson Fury leh American boxer Deontay Wilder-te chu a ṭum thumna atana inhnek turin inremna neih a ni tawh tih a sawi.
WBC heavyweight champion Wilder leh Fury-te hi an inhnek hnuhnung berah sawisel hlawh taka an in-draw hnuah Inrinnia Las Vegas-a rematch nei leh turin an inbuatsaih a ni.
Warren chuan, “A tlawm zawkin rematch neih leh rawt turin ni 30 hun neih chu an remti a ni,” tiin a sawi a, kum 31 mi, Fury hian December 2018-a Los Angeles-a an inhnek ṭum khan chak a inring hle a, mahse Judge-ten an in-draw tir a, ‘the Gypsy King’ an tih, Fury hian boxing a chawlhsan hma ngeia Wilder, 34, hi hneh ngei a duh a ni.
Hetihlai hian Fury hi 2015-a Wladimir Klitschko hneha WBA, IBF leh WBO heavyweight title a lak hnu khan kum 3 zet rilru lam harsatna vangin boxing ring chhungah a lût lo a ni.