Serchhip District chhunga sawrkar ram enkawl dan tur sawiho

Nimin khan District Level Authority on The Mizoram Government Land Pooling & Management Scheme, Serchhip district chu an Chairman Dr. Lalzirmawia Chhangte, IAS, District Bawrhsap ni bawk hovin DC Meeting Hall-ah an ṭhukhawm a, Serchhip district chhunga sawrkar ram enkawl dan tur an rel.

Dr. Lalzirmawia Chhangte chuan sawrkar department ṭhenkhat, ram nei zau tak hmang ṭangkai silo an awm laiin, department ṭhenkhat ram mamawh em em, ram nei silote an lo awm thei bawk a. Sawrkar pakhat hnuaia mi vek an nih si avangin heng department hrang hrang ramte hi chhûnkhawm a, mamawh tawk ang zela hman ṭangkai dan thar sawrkar chuan a rawn duang a, State level authority leh district level authority te dinin, a vawi khatna atan an ṭhukhawm ta a ni, a ti a. District Level Authority hi Estate Management Cell, DC office-a din turten an puibawm dawn a ni.

Member Secretary C.Lalduhzuali, SDO (Sadar) chuan The Mizoram Government Land Pooling & Management Schemes chungchang leh District Level Authority te mawhphurhna sawifiahna a nei a, District Land Revenue & Settlement Office aṭanga department hrang hrangte ram neih dan an lo lâkkhawm tawh chinte pawh report nghalin, hmun 53-a sawrkar ram pass an chhinchhiah tawh thu a sawi a, department ṭhenkhat, an hmunpui lama pass enkawl an awm nual avangin a la pung chho zel dawn a ni, a ti.

Meeting hian office hrang hrangte chu March ni 31 ral hmaa an ram neihte fel taka report hman turin a ti a ni.

Mizoram sawrkar hian ni 14.9.2018-ah khan The Mizoram Government Land Pooling and Mangement Scheme hman chungchang hriattirna hi a lo tichhuak tawh a, ni 11.11.2019-ah tlema siamrem niin, he dan hmang hian sawrkar department hrang hrang ram neihte chu chhungkhawm (pool) in General Administration Department chuan mumal leh ṭangkai zawka hman theih turin a enkawl tawh dawn a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram