Ni 3 chhung awh FAI (Fédération Aéronautique Internationale) Category II International Paragliding Accuracy Championship, 2020 Serchhip-a neih chu Inrinni tlai khan khâr a ni a, Chief Minister Zoramthanga’n khârna hun hi a hmanpui a ni.
Kar kalta Nilaini tlaia hawn International Paragliding Accuracy Championship 2020-ah hian ram hrang hrang aṭanga tel Pilot-te chuan ṭum 8 thlawkchhuaka inelna an neih hnuah Inrinni khan he inelna hi zawhfel a ni a, a pumpui-ah South Korea aṭanga rawn kal te an che ṭha hle a, mipa lamah pakhatna chu Byung Chang Jeun (South Korea) a ni a, pahnihna chu Igor Virshki (Kazakhstan) niin, pathumna chu Vishal Kumar (India) a ni.
Hmeichhe category-ah Jin Hee Baek (South Korea), pahnihna Jae Ryun Ha (South Korea) leh pathumna Rupa Devi Karki (India) te an ni a. Lawmman hi mipa leh hmei-chhe category-ah hian pakhat-nain euro 2000, pahnihnain euro 1500, pathumnain euro 1300 an dawng a ni. Team intihsiaknaah pakhatna Korea team, pahnihna Bir Billing leh pathumna 3K te an ni a, he intihsiaknaah hian Macedonia leh Slovenia aṭangin endiktu an lo kal a, intihsiakna neih chhung hian competitor te zingah inhliam a awm lo a ni.
He intihsiaknaah hian ram 4 – South Korea, Afghanistan, Kazakhstan leh India aṭangin Pilot 23 an tel a ni.
International Paragliding Accuracy Championship 2020 khârna hun hi Inrinni tlai khan he intihsiak neihna hmun, Serchhip Zawlpui phaiah neih a ni a, he hunah hian Chief Minister, Zoramthanga chuan thu sawiin, Mizoram chu hma-sawnna kawngah la sang lo hle mahse tih tak zeta thawh chuan kawng chi tin rengah hma a hruai thei, a ti a. Mihring tlem lam a ni lova, theitawp chhuah chuan khawvel hriat hlawh theih a ni a, ram dang miten Mizoram châk taka an rawn tlawh theih nan – nun, chetzia leh rilruah theihtawpa ṭan lain, vawiina rahbi pakhat rah tak chu khawvela thil pawimawh tling pha a ni a, a dawt leh ah pawh rahbi pawimawh chuan kai a la ni ngei ang, a ti.
Tourism Minister Robert Romawia pawhin thu sawiin, Mizoram sawrkar chuan adventure sports a ngai pawi-mawh a. Paragliding-ah khawvel hriatah Mizoram chu pho chhuah a ni tawh dawn a, he cham-pionship hi Serchhip emaw Mizoram emaw thlen a ni mai lova, India ramin a thleng a, India ai Mizote’n an awh a ni, a ti.
Kharna inkhawm hi Esther Lalruatkimi, IRS, Commissioner & Secretary, Tourism chuan kaihruaiin, Serchhip DC Dr. Lalzirmawia Chhangte chuan lawmthu sawiin hun hi a khar a. Serchhip bialtu MLA Laduhoma, Tuirial bialtu MLA Andrew H.Thangliana, Tourism Development Board Vice-Chairman TC Pachhunga leh Adviser to CM C.Lalramzauva te tel bawkin lawmman hi an sem a ni.