Kar kalta Ningani leh Zirtawpni khan Information & Public Relations Department buatsaihin MJA, Serchhip District member-te chuan Serchhip DIPRO K.Sai-tluanga hova SEDP Project Site Visit for MJA, Serchhip District neiin, Serchhip District chhunga Pradhan Mantri Gram Sodak Yojana (PMGSY) hnuaia kawngpui siam ṭhenkhat an tlawh.
Ningani zing khan Ser-chhip chhuahsanin, Khawlai-lung leh Piler inkar kawng siam mek an tlawh a, hetah hian C.Lalfakzuala, JE., PWD, N.Van-laiphai chuan lo dawngsawng-in, MJA member-te hi an hna-thawh mek chungchang hrilin, zawhnate a chhang nghal a, he kawng hi survey-ah 4.16kms. a nih laiin Formation Cut tihfel hnuah meters 173 vela a thui belh avangin contract agreement amount cheng nuai 640 pawh tihsan a ngai dawn tih a sawi a, contractor hi Roenga, Republic Veng Aizawl niin, tunah hian GSB phah zo tawhin, kumin May thlaah chuan siam zawh beisei a ni.
Piler kawng en zawhah Khawlailung aṭangin Hmun-zawl an pan a, Khawlailung leh Hmunzawl inkar kawng chu PMGSY hnuaia siam theih a nih loh avangin scheme dang aṭanga siam dan awm se an duh thu an sawi.
Hemi hnu hian kum 2016-a thawh zawh tawh Hmunzawl aṭanga Lungpho inkar kawng (30.80 Kms.) leh Lungpho aṭanga Rullam inkar kawng (16.90 Kms.)-te tlawh lehin, hetah hian Lalrintluanga, SDO, PWD Kawlkulhin a lo dawngsawng a, Lungpho aṭanga Hmunzawl kawng hi siamtu hi F.Kapsanga Construction (FK) an nih thu leh, estimate hi cheng nuai 2093.43 a nih thute, March, 2016-a thawh zawh a nih thu leh Rullam leh Lungpho inkar chu H.Thangzova, Tuikual North thawh niin, contract agreement amount chu cheng nuai 963.68 a nih thu leh, November 2016-a an thawh zawh thu a sawi a, PMGSY hnuaiah hian an hnathawh zawh aṭanga kum 5 chhung chu contractor-ten a enkawl zui hna an thawh a ngaih thu a sawi bawk a, tunah hian heng kawngte enkawl hna hi contractor kuta a la awm thu a sawi a. Helai kawng tlawhtu MJA member-te chuan heng kawngte hi siamṭhat ngai a awm zeuh zeuh nia an hriat thu an sawi a ni.
Zirtawpni khan Sialhau leh Thentlang inkar kawng siam hna thawh mek an en zui leh a, he kawng enkawltu Lal-duhzuala, SDO, PWD Serchhip leh Contractor-ten lo dawngin hmalakna tlangpui an lo hrilh-fiah a, Contractor hi V.Lalbiak-zama, Venghlui niin kawng thui zawng hi 19.540kms a ni a, estimate hi cheng nuai 1188.58 a ni a, he kawng hi hna thawh ṭan mek a la ni chauh a, Lalduhzuala chuan Sialhau Pengṭhuam leh Lungpho Ramrikawn inkar kawng hi PMGSY 2-ah proposal thehluh a nih thute, Khawlailung leh Hmunzawl inkar kawng pawh survey tura ruahman a nih thu te a sawi a, a hlawhtlin thuai an beisei thu a sawi a ni.
SEDP Project site visit-ah hian MJA, Serchhip District hi an president Kapliana Pachuau hovin member 7 an kal a, Zirtawpni tlai khan Serchhipah an lo let leh a ni.