Myanmar luh phalna pek chhuah thuai tum

Mizoram mi, a bikin Myanmar ram chhung mel 16 thlenga kal theite tan Ministry of External Affairs chuan ramri kâna Myanmar luh phalna (border pass) pek chhuah thuai a tum.

Kar kalta Thawhṭanni a Ministry of Home Affairs huaihawta ramri a intlawhpawh dan (free movement regime) chungchang sawihonaah Mizoram lam aṭanga Myanmar a luh dan siamfel ni se tih an rel a, Rihdil thleng vela kal theihna atan border pass siam ni se, chutiang phalna chu Ministry of External Affairs in lo buaipui se an ti a. He inhmuhkhawmna a tel ve official pakhat chuan border pass hi siam thuai a nih tur thu a sawi a. Hemi atan hian internet hmangin ruahmanna siam a ni ang a, Myanmar luh phalna neite chu an phalna nambar nen phone-ah pawh en theih leh endiktute entir mai theih turin portal siam a ni ang a. Rih dil thlenga zinna tur lirthei ruahman tum a ni bawk a ni.

He inhmuhkhawmnaah hian China siam lirthei ke hnih nei Kenbo, Mizoram chhunga tlan reng reng chu man vek turin Mizoram sawrkar hriattir a ni a. Khilama awmte’n One-two-fai an tih mai he lirthei ke pahnih nei hi an uar hle a, ramri tawn tawnah mi tam takin an hmang a ni. Sawrkar laipui chuan Customs duty engmah pe lova lâkluh a nih avangin dân kalh a ni tiin, man khawm turin thu a pe a. Hei bakah hian Asia chhim lam ramte aṭanga Mizoram kaltlanga kuhva rah lo lut ṭhin chu man zel turin Mizoram Police-te hnenah thupek a ni a. Hemi rual hian India ram aṭanga leiṭha Myanmar a phurh luh turte chu lo man zel tura thupek a ni bawk a. Assam Rifles te chu ramri aṭanga kilometre 16 chinah lo man tur leh an thil mante chu Police leh Customs thuneitute hnena hlan tura hriattir an ni.

Sawrkar laipui chuan leiṭha (chemical fertilizer) hi state hrang hranga kuthna-thawktute hman tura sorkarin sum tam tak senga a tihhniam sak bakah duh duha hralh chhuah mai mai khap thil a nih avangin Myanmara a hralh hi a khap a. Hetianga Myanmar lama hralh a nih hian kuthna-thawktute’n an chanpual tur an chan loh bakah India sawrkar tan hekna a nih thu an sawi a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram