Zothlifim Logo
Loading ...

Aizawl khawpui daia Tuirial lui chu hun engemaw chen a nu tawh a, a nut chhan chhuichiang turin Chief Secretary Lalnunmawia Chuaungo chuan a hriattir.

Thulakna tarlan danin, Tuirial YMA hruaitute chuan tui nu hi nikum lam atangin a awm tawh tih an sawi a, kumin ah phei chuan fim lai a la nei lo niin an sawi a. Tui nut chhan hi an la chhuichiang chiah lo nain Chite luiah leivung paih an awm thin vanga hetia tui hi nu ta nia an hriat thu an sawi a, kar tharah hian hmalak an tum niin an sawi.

Tuirial YMA hruaitute chuan lui tui a nut avang hian an tan harsatna a thleng nasa hle niin an sawi a, lui dunga sangha an humhalh pawh a tihbuai phah bakah thal a insu thin te pawhin harsatna an tawk niin an sawi.

Tuirial tui nun chungchangah hian Chief Secretary Lalnunmawia Chuaungo chuan hma la nghalin PCCF, Aizawl DC leh Mizoram Pollution Control Board te chu thil awmdan chhuichiang nghal turin a hriattir a. CS chuan eng vanga nu nge, khawilai atanga nu tan nge tih enfiaha report pe thuai turin a hriattir a ni.

Tuirial nu hi tunhnaia sawi tan a ni a, kum dang thal lai chuan a fim thin a. Tunhnaiah ruah sur sawi tham a awm loh vangin a tui chu fim tura ngaih a ni.