Zothlifim Logo
Loading ...

SERCHHIP: Nimin khan Planning & Programme Department Phase 2 Conference Hall ah Village Level Development Programme kalpuina tura din State Level Coordination Committee te chu programme hnuaia pilot project atana thlan khaw 6-a hmalak dan tur relin an thukhawm.

Meeting hi Lalrikhuma Sailo Principal Adviser-cum-Additional Secretary, Planning & Programme Implementation Department chuan a kaihruai a, Dr.Lalrinchanna, Adviser-cum-Joint Secretary, Planning & Programme Implementation Department Village Level Development Programme chung-changa inbuatsaih dan tur leh Line Department hrang hrangte thawhho dan turte a sawifiah a ni.

Lalhmansanga Hnamte, Director, State Institute of Rural Development and Panchayati Raj chuan Village Level Development in a tum – heng khaw thlan leh a cheng mipui-ten hmasawnna kawngah an mamawh hrang hrang te, Department te nen inrawn a, Plan duan anih thu te a tarlang a ni.

Meeting cum Workshop ah hian Coordination Committee-a tel Line Department hrang hrang aiawhte chu Village Level Development Prog-ramme hnuaia an mawh-phurhnate leh an chanvo te leh Village Development Plan duanna kawngah an tih tur te hrilhfiah an ni.

Ruahman ang chuan Line Department hrang hrang ten khaw thlan bika an scheme hmanga hna thawh dan tur ruahmanna SIRDPR ah an thehlut ang a, a rang thei ang berin awareness neih zui a ni dawn a ni.

Village Level Development Plan-in a tum ber chu hmasawnna mamawh te a khaw mipuite nen inrawn-khawm a, an mamawh te tihpuitlin kawnga development plan duanpuite, khaw entawn-tlak ni tura a khaw mipuite zirtir leh buatsaihte, entrepreneurship hmanga a khaw mipuiten eizawnna ngelnget an neih thei nan kaihhruai leh zirtir te leh central leh state sawrkar scheme te fel taka hmasawnna a awm thei nana khaikhawm te a ni.

Village Level Development Programme hi Planning & Programme Implementation Department duan niin a pilot project atan District 6-ah khaw pakhat zel thlan an ni a, heng khuate hi – Aizawl District ah Sailam; Lunglei District ah Sekhum; Champhai District a Chawngtlai; Kolasib District ah Lungdai; Serchhip District ah Leng leh Mamit District ah Ailawng te an ni.