Categories
Chanchinthar Hriselna leh Damdawi Mizoram

Kum 3 chhungin Mizoramah Cancer vangin mi 2176 an thi

Mizoramah hian kum 3 chhungin mi 2176 cancer vangin an thi a, chawh-rualin kum khatah cancer vangin mi 725 thi ṭhin ang a ni.

Nimin khan Mizoram sawrkar Health and Family Welfare Department bultumin World Cancer Day chu Health Minister Dr R.Lalthangliana hovin Assembly Annexe Conference Hall, Aizawlah an hmang a, he hunah hian Dr R.Lalthangliana chuan thusawiin, cheng vaibelchhe 500 zet senna tur Zemabawka Cancer Speciality hospital sakna tur JICA-te nen ruahmanna an siamfel tawh tih sawiin, “rang takin bul kan ṭan thei dawn,” a ti a. He hospital sak tura ruahman hi hmarchhak state te zinga cancer enkawlna hospital ṭha ber a nih a beiseiawm tih a sawi a. Damlo enkawlna kawngah thiamna, hmanrua leh khawl ṭhate a pawimawh em em rualin thawktute inpekna a pawi-mawh lehzual tih sawiin, Minister chuan doctor te leh nurse-ten damlo-te an dawr dan a pawimawh a, an ṭawngkam leh thlamuanna awkâ-in damlo na tak tuar te nasa takin a chhawk thei a ni, a ti.

Cancer hi kum tin khawvel pumah mi maktaduai 9 leh nuai 6 vel thihna thlentu a ni a, khawvela thihna thleng zawng zawng chawh ruala hmun ruka ṭhena hmun khat hi cancer natna vang a ni a. Ram changkangte aiin ram changkang lo zawk (low and middle income countries)-ah cancer avanga thihna a thleng tam zawk a, cancer vanga thi za zela 70 te hi heng ram changkanglo zawka thleng a ni. Cancer thlentu hi thil chi hrang hrang a awm rualin a thlentu tam ber chu vaihlo niin cancer natna za zela 30 hi vaihlo zuk leh hmuam vang a ni.

Khawvela mihringte thihna thlentu natna zingah lung natna dawtah cancer hi a sâng ber a. He natna laka inven dan, enkawl dan tur leh hmuhchhuah hma kawngah inzirtirna beihpuithlak nan Union for International Cancer Control (UICC) bultumin khawvel pumah World Cancer Day hi hman ṭhin a ni a. Mizoramah pawh kum 2014 aṭang khan he ni hi kum tin hman ṭhin a ni. Thupui hi kum thum atan thlan ṭhin a ni a, kum 2019 aṭanga 2021 thlenga an thupui thlan chu “I am and I will” tih a ni.

Programme hi National Health Mission (NHM) Mission Director Dr. Eric Zomawia’n a kaihruai a, Cancer management chungchang Dr Jeremy L Pautu, National Programme for Prevention and Control of Cancer (NPCDCS) State Nodal Officer chuan a sawi a. Mizoram State Cancer Institute a Radiation Oncology Head of Department ni lai Dr B.Zothankima pawhin World Cancer Day thupui sawi zauna hun a hmang bawk a ni.

By Editor

C.Lalrochhuanga,
New Serchhip, Serchhip - 796181
Mizoram
Contact: WhatsApp | Phone Call | Telegram