Chief Minister’s Relief Fund hman dan tur ngaihtuahtu atana din Committee on Utilization of Chief Minister’s Relief Fund for COVID-19-in an meeting hmasaa Local/Village Level Task Force-te tana sum sem chhuah tura a ruahman dan chu a tidanglam.
Vawiina an Chairman Lalnunmawia Chuaungo, Chief Secretary hova Chief Secretary’s Conference Hall, MINECO-a ṭhutkhawm vawi thumna an neihah meeting hmasaah Mizoram puma LLTF/VLTF 893 te hnenah sum inzat ṭheuha sem chhuah nise an lo tih tawh chu an ennawn a, khua leh venga mipui cheng zat a zirte, duty-te mawhphurhna hautak zual bikte leh ramri depa khaw awmte thur chhuakin, heng hi Category 4 – A, B, C leh Special Category-ah an ṭhen niin, CM Relief fund aṭanga sum an dawn zat tur hi an mamawh dan a zirin a danglam dawn a ni. LLTF leh VLTF te hnena sum semchhuah tur belhkhawm hi Rs.2,04,85,000/- a ni.
Meeting hmasaa lo rel tawh angin Home leh Centre hrang hrangte hnenah cheng nuai 23.65 pek a ni ang a, BSUP (Basic Services to Urban Poor)-a cheng chhungkua te tan cheng nuai 6 sem a ni dawn a, heti hian CM Relief Fund aṭanga COVID-19 dona sum sem chhuah tur zat hi Rs.2,34,50,000/- a ni.
District tina DC ṭheuhte chu thil pawimawh zual bikah CM Relief Fund aṭang hian ṭanpuina an dil thei ang, tiin meeting-ah hian rel a ni a, ṭanpuina an dil dawn a nih chuan report chiang tak nen chhan fel taka ziakin an thlen a ngai thung dawn a ni.