Zothlifim Logo
Loading ...

Rampuma inkharkhip ṭum thumna (lockdown 3.0) kalpui mekah nimin khan Addl. DC, HD Lalpekmawia hovin, Serchhip khawpui chhunga Village Level Task Force (VLTF) on Covid-19 kalpui zel dan tur chungchang sawiho niin, VLTF te chuan kawngpuia hrui pawh leh movement permit pek chhuah hna thawk chhunzawm zel se an ti.

Meeting-ah hian Addl. DC chuan, May ni 4-17, 2020 chhunga lockdown kalpui tur a nih leh tak avangin sawrkar thuchhuakte zawm a ṭulzia a sawi a, state sawrkar-in inkaihhruaina dan a siamah VLTF-te chu mawhphurhna sang tak pek an nih thu a sawi a, lockdown hmasa-te chu VLTF leh khaw-tlang hruaitute leh tlawmngai pawl hrang hrangte thawh-hona leh inpekna avanga hlawhtling a nih ang bawkin tun lockdown-ah pawh hian ṭanrual leh ṭul a tih thu a sawi a ni.

He hunah hian Serchhip khawpui chhunga VLTF 11 aiawhte an tel a, Covid-19 laka invenna leh sawrkar thupek leh dante zawm tur chuan VLTF duty chhunzawm chu a la ṭul nia an hriat thu an sawi a, duty-na hmuna hrui pawh leh movement permit pek chungchang-ah vote lak niin, VLTF 11 kal aṭanga VLTF 6-in hrui pawh chhunzawm an duh avangin hrui pawh hi chhunzawm a ni dawn a, VLTF 8-ten veng danga kal dawna VLTF-te hnen aṭanga lehkha (movement permit) lak hmasak zel an la duh angin hei pawh hi kalpui chhunzawm a ni dawn a ni.

He hunah hian lockdown 3.0 chungchanga Mizoram sawrkar thupek chhuah leh The Mizoram (Containment and Prevention of Covid-19) Ordinance, 2020 zirhona neih niin, VLTF-te chu heng dan leh thupekte hi uluk taka zirchiang a, zawm turin ngen an ni. Hei bakah hian VLTF-te chu an huam chhungah mipuite hriat turin dawr hawn leh khar hun, mipui-te pawna chhuah chung-chang, social distancing leh vantlang hmuna hmai tuam, lirthei intlanchhawk leh zan lama curfew chungchangte zau leh zuala puan nise an ti a ni.

The Mizoram (Containment and Prevention of Covid-19) Ordinance, 2020 chuan VLTF Chairman, Vice Chairman leh Secretary-te chu dan bawhchhetute pawisa chawitir theihna thuneihna a pek thu te, he an thuneihnate hi thiam tak leh dik taka hmang tura ngen an ni a, pawisa chawitir an awm a nih chuan dik taka record vawng turin VLTF-te chu chah an ni bawk.

He inhmuhkhawmnaah hian Dr. Laldawngliana Sailo, Chief Medical Officer, Ser-chhip leh Victor Zothansanga, SDPO, Serchhip-ten thu an sawi bawk a ni.