Chelsea-in Lampard an bân ta

Chelsea chuan thla 18 an chhawr hnuah Frank Lampard chu an head coach aṭangin an bân.

Chelsea midfielder hlui Lampard, 42, hian kar kaltaa Leicester City an hneh loh hnu khan Chelsea chu Premier League Table-1 9-naa awmin a kalsan a, an league match hnuhnung pangaah vawi khat chiah hnehna an chang a, Chelsea a enkawlnaah a match hnuhnung ber chu chu Pathiannia FA Cup fourth round-a Championship laka 3-1-a an chak ṭum kha a ni ta a ni.

Lampard hi kum 2019 July thla khan Maurizio Sarri thlâkin Chelsea hi a enkawl ṭan a, kum 3 leh a chanve daih tur contract a ziak a, a season hmasa berah hian Chelsea chu league-ah palina a nihpui a, FA Cup final a thlenpui bawk a, nikum December thlatir khan Chelsea chu Leeds laka 3-1-a chakin Premier League hma a hruapui a, mahse tunhnaia league-a an game khelh hnuhnung 8-ah ṭum 5 ngawt an chak lo a, hei vang hian Lampard hi bân a ni ta a ni.

Chelsea chuan thuchhuah an siamah, “Hei hi thutlukna siam harsa tawpkhawk a ni,” an ti a, “Frank-a’n he club-a head coach a nih chhunga hlawhtlinna min chanpuinaah kan lawm a. Amaherawhchu, tun hnaia result leh khelh danah club-in a beisei ang a pha lo a ni,” an ti a, hmasawnna tur kawng mumal awm si lova table laihawla awm chu him lo an tih thu an sawi bawk.

Club legend Lampard nen an inṭhen hrang reng dawn lo tih an sawi a, mahse tun season-a an club result leh an khelh dana hmasawnna neih ngei a ngaih avangin inthlakkual tura thutlukna siam chu a ṭul tih sawiin, rei tak an sawiho hnuah thutlukna an siam tih an tarlang bawk.

Chelsea neitu Roman Abramovich pawhin Lampard chu bân ni mahse club tan ‘icon pawimawh’ tak a la ni zui zel dawn tih a sawi a, amah nen pawh mimal taka inkungkaihna ṭha tak an neih avangin club tana thutlukna siam chu a harsa hle tih a sawi a, Lampard chu club inpumkhatna atan a thawk ṭha a, a thawkrim bawk tih a sawi a, mahse tuna an hun tawng mekah chuan manager thlak chu a ṭha ber nia an hriat avangin he thutlukna hi an siam ta tih a sawi bawk a ni.

Lampard hian a season hmasa berah hian player lakluh a nei lova, mahse nikum nipui kha chuan player liantham 7 lakluh nan £200m a hmang a, hei hi nipui transfer-a Chelsea sum hman tam ber ṭum a ni.