Mesut Ozil chuan free transfer-a Arsenal aṭanga Fernerbahce a zawmfel hnuah “a damchhunga gunner” a nih dawn thu a sawi.
Germany midfielder kum 32 mi hian Turkish club tan hian kum 3 leh a chanve daih contract a ziak a, Arsenal-a a awm lai hian competition hrang hrangah game 254 khelin, goal 44 a thun hman a, FA Cup ṭum 3 a chawi hman a, mahse nikum March thla aṭang khan first team tan a inkhel tawh miah lo a ni.
Ozil-a’n Arsenal hnena open letter a thawnah chuan, “He club leh fans-te ka thinlunga ka hmangaihzia hi fiah taka ziah chhuah a har hle a. Engtinnge kum 8 chhunga ka lawmna zawng zawng kha lehkhathawn pakhata ka sawi zawh theih ang ni?” tiin a ziak.
Ozil hian kum 2013 khan Real Madrid aṭangin Arsenal player man to ber ni turin Emirates Stadium hi £42.4m-in pan a, a season hmasa berah Arsenal-in kum 9 lai trophy an chawi tawh loh hnuah FA Cup a chawpui nghal a, January 2018 khan Arsenal chanchina player hlawh hnem ber ni turin kum 3 leh a chanve daih tur contract thar a ziak a, kar khatah £350,000 a hlawh a, mahse nikum nipui khan a hlawh hi tihhniamsak a ni ta a ni.