Covid-19 hri darh zel tur venna atana inkhuahkhirhna thlahdul hret a ni

Covid-19 hri darh zel tur venna atana inkhuah-khirhna thar siam chu Inrinni khan Mizoram sawrkar chuan tichhuakin, inkhuahkhirhna thlahdul hret a ni.

Mizoram State Disaster Managemnet Authority Chairman, Chief Secretary, Lalnunmawia Chuaungo-in Inrinnia thupek a tihchuahah, tun hnaiah Mizoramah Covid-19 hri kai an tlêm tak zel avang leh Mizoram dinhmun a ṭha nia a lan avangin inkhuahkhirhna thlahdul hret a nih thu leh, thupek hi hman nghal tur a nih thu a chhuah a, inkaihhruaina tharah chuan District Hqrs.-a zan curfew hun zan dar 8 aṭanga zing dar 4:30 inkar ni ṭhin chu darkar chanve-a pawt tawiin, zan dar 8:30 aṭanga a tuk zing dar 4:30-ah sawn a ni a, hei hi district bawrhsap ten thuchhuah an siam dawn a ni. Bawrhsap ṭhenkhat chuan curfew hun sawn thupek hi an chhuah tawh a, Aizawl bawrhsapin mi 5 aia tam khawlaia punkhawm a khapna pawh hlih nghal a ni.

Aizawl Municipal area-a lirthei intlanchhawk dan pawh hri leng avanga inkharkhip hmaa tlan dan ṭhin chu hman leh tur a ni a, nimin khan Aizawl Traffic Police SP chuan dan thar hi a tichhuak a, Thawhṭanni aṭanga Zirtawpni inkarah number tawp indawt 2 zel an tlan chhuak thei dawn lo a ni.

Sakhaw biak inkhawm-naah hri darh lohnana invenna vawng chungin a hmuna leng zat chanve aia tam lovin February thla aṭangin chhun lam inkhawm theih a ni ang a, mipui pungkhawm hi mi 200 aiin an tam tur a ni lo thung a, pawl 10 leh pawl 12 board exam turte tan January ni 22 aṭangin zirna in leh hostel hawn a ni ang a, hostel lût tur ten RAT hmanga hri an kai lo tih finfiahna hostel an luh hma darkar 96 chhunga lak an nei ngei tur a ni a. College leh University te chu February thla aṭangin a tahtawlin zirna in sang thuneitute leh sawrkar phalnain hawn theih a ni ang a, training institute-te pawh a hmuna leng zat chanve tan hawn theih a ni bawk ang.

Infiamna hmun, puipuinna hmun leh intihhlimna hmunte pawh a hmuna leng zat chanve leh inchhungah mi 50 ai tam lo leh pawnah mi 100 ai tam lo tan hawn phal a ni a, mithhi vui leh inneih inkhawmah a hmuna leng zat chanve emaw, mi 100 aia tam lo punkhawm phal a ni a, hetah hian a hmaa kaihhruaina siam erawh hman chhunzawm tur a ni.

Inkaihhruaina tharah hian state pawn aṭanga lo lutte tan inthlahdul chin a awm nâ-in, khuahkhirhna dan kalpui zui a nih tur thu tarlan a ni a. Mizoram atanga zinchhuak, darkar 96 chhunga rawn lêt leh te chu an lo luhna hmunah uluk taka lo endik a ni ang a, Rapid Antigen Test (RAgT) tih a ni bawk ang. RAgT hmanga endikna a hri kai lo tih hriatte leh hri kai lang chhuak lo te chu khunghran an ngai lovang a. Europe atanga 1o haw te erawh chu khunghran ngei ngei tur an ni a, in lama inkhunghran phalsak an ni dawn lova, India ram hmun dang aṭanga Mizorama lo lutte zingah RT-PCR/CB-NAT/TrueNAT hmanga Covid-19 test negative certificate darkar 96 aia hlui lo neite chu khung hran an ngai tawh dawn lo thung a ni.