Nimin khan Serchhip District Anti-Tobacco Squad leh District Legal Metrology staff-te chuan Serchhipa dawr ṭhenkhatte endikin, dân lova ram pawn aṭanga Cigarettes lakluhte an man.
Serchhip District-a Legal Metrology Inspector Johny Zonunmawia hova nimina dân phal lohva cigarettes lakluh dapnaah hian Serchhipa dawr lian (whole sale dawr) hrang hrangte endikin, dawr 3 aṭangin dân lova ram pawn aṭanga lakluh cigarettes Carton 79 man a ni a, nimina cigarettes an mante hi V Cigarettes Carton 47, Far Star Carton 30 leh Paris Carton 2-te man a ni a, heng cigarettes zuartute hi dân anga hrem niin, Legal Metrology Office-a in-report tura hriattir an ni.
Legal Metrology Department chuan tun thlatir khan hriattirna tichhuakin, ramdang aṭangin dân lova Cigarettes lak luh (Contraband Cigarettes) a tam hle tih hriat a nih thu leh, heng te hian The Legal Metrology Packaged Commodities Rules, 2011 a kalh avangin ramchhunga lakluh, zawrh leh hralh khap tlat a ni tih a lo tarlang tawh a, Inspector of Legal Metrology-te pawh mahni bial ṭheuhah inspection nei tur leh a ṭul anga man turin a lo hriattir tawh a ni.