Kohhran Inkhawm chung-changah Presbyterian kohhran chuan February thla aṭanga Pathianni chhuna biakina inkhawm dan turah tualchhung kohhran tinin an remchan dan anga kalpui mai turin a ti.
Synod Secretary Upa Lalrinmuana chuan thuchhuah siamin, Covid-19 hripui leng avangin March 22, 2020 aṭangin thla 10 emaw lai chu Kohhran Inkhawm neih theih a nih tak loh thu a sawi a. Tunah hian sawrkarin Inkaihhruaina (Standard Operating Procedure) siam tharin February 2021 atang chuan Inrinni leh Pathianni chhunah Kohhran Inkhawm neih theih a ni dawn a. Hemi chungchang hi Synod Officers’ Meeting (OM) chuan a ngaihtuah a. Presbyterian Kohhran chuan Pathianni-ah Inkhawm kalpui tur a ni ang a. ‘Chhun’ tih hian ‘Khaw en chhung’ a huam niah a ngai a. Hemi chhunga Inkhawm kalpui dan tur chu Tualchhung Kohhranin anmahni remchan dan leh tha bera an hriat ang theuha rel mai turah a ngai a ni, a ti.
Inkhawm zai leh zai loh thuah chuan sawrkarin Kaihhruaina a siam zui ni se, Inkhawma telte hripui inkaidarh theihna tur lakah an him theihna turin fimkhur leh uluk taka ruahmanna siamin inkhawm kalpui theuh turin Kohhran tin Synod chuan a ngen a ni, tiin Synod Secretary chuan a tarlang a. Lehkha hi a pangngaia thawn chuan a tlai dawn avangin Synfo kal tlanga hriattirna hi official-a lo pawma hma lo la nghal turin Kohhran tin chu Synod Secretary chuan a ngen a ni.