‘Ramlai Malsawmna’ dawnna kawng hnai leh ngil ber chu sawrkar lai party candidate thlan tlin a ni:C.Lalramzauva

C.Lalramzauva, Sr. Advocate, Adviser to CM chuan Pastor Chawna’n inlarnaa a lo hmuha a sawi fo ṭhin ‘Ramlai Malsawmna’ dawng turin Serchhip Bial mipuite an inbuatsaih mek a, chumi atan kawng hnai leh ngil ber chu sawrkar lai party candidate thlantlin hi a ni mai, a ti.

C.Lalramzauva hian nimin khan Serchhip Press Club-ah thuthar thehdarhtute kâwmin he thu hi a sawi a, thuthar thehdarhtute a kawmnaah hian C.Lalramzauva chuan Serchhip bialtu MLA atana bialchhung mipui-ten duhtaka an lo thlan tlin Lalduhoma MLA aṭanga bantir a nih chungchangah Serchhip bial mipuite leh Zoram mipuiten thudik an hriat theih nan thuthar lakhawmtute chu a kâwm tih sawiin, Lalduhoma chuan MLA aṭanga paihna tur dân an siamte a zawh famkim tih sawiin, Lalduhoma’n MNF-te ramhnuai aṭanga an lo chhuah hlima independent MLA an nih laia disqualify tura tumahin an beih ve loh chungchang a sawilan ṭhinah khan MNF MLA-te kha registration an neih hman loh vang chauha independent-a ding niin a sawi a, mipui pawhin an hrethiam tih sawiin, khatihlai khan midangin tuna Lalduhoma bantirna dân chungchang hi an ngaihtuah ve lo pawh a ni thei a ti a, dân diklo hi sawisel loh chuan a dikloh angin a kal mai a, miin an sawisel chuan dân dika a kal a ngai mai ṭhin tih sawiin, MLA 12-te khan Lalduhoma’n dân a bawh-chhiat chungchangah khan hma la lo ta se chuan hre reng chunga thil sual ngaizam an ni thei dawn a ni, a ti.

Hei bakah hian Lalduhoma’n Independent candidate anga nomination a file chhana a sawi, khatihlaia ZPM chu political party ni tura registration process tih zawh a la nih loh vang tia ṭan a khawh chu hriatthiam har a tih thu sawiin, ZPM chuan inthlan zawh hnu, ni 21.1.2019-ah Election Commission of India hnuaia political party nihna tur dilna an thehlut chauh a, he dilna (application)-ah hian chutihlaia ZPM General Headquarter President Dr. Kenneth Chawngliana chuan ni 10.1.2019-ah hming a sign chauh tih finfiah a ni tih a sawi bawk.

Thuthar lakhawmtuten ZPM MLA dangte hi MLA aṭanga bântir tumin hma an la zui dawn em tih zawhna chhângin C.Lalramzauva chuan ‘han veh han veh takah chuan tihdante chu a awm thei ngei ang’ a ti a, mahse midangte hi chu an tualdawi deuh a, Lalduhoma angin an che ve bawrh bawrh lo bawk a, hei vang hian ‘kan hotuten beih zui ngaiah an dah lo pawh a ni mai thei,’ a ti bawk.

C.Lalramzauva chuan Serchhip biala MLA by-election neih tur chungchang pawh sawilangin, ZPM leh Congress-ten an chuh dawn tih a chiang tawh a, MNF pawhin candidate tur la tifel lo mahse an chuh dawn chiang tih sawiin, MNF party candidate tur chu party hotuten an ngaihtuah ang a, Serchhip bial tana ṭha ber tur an rawn ruat ngei ang tihah MNF mipuite chu an lungrual tlang tih a sawi a, tun hnaia Serchhip bial chhunga thilpek hrang hrang sem chhuaktu, Michael Chhakchhuak chungchanga thuthar lakhawmtute zawhna chhângin, C.Lalramzauva chuan “MNF-a a inchhâl a nih chuan a lo inchhal a ni ve mai a, helaia kan party hruaitute an thawkho lova, MNF official candidate chuan a ding lovang,” tiin a sawi a, amah chu din leh a tum em? tih zawhna pawh chhângin, tun ṭum chu “Serchhip bial min hmangaihpuitu tur kaichhan sawm ka tum a ni,” tia sawiin, candidate tur chungchangah party chhunga inhruipawhna a awm loh thu a sawi bawk.

Kum 2018 MLA inthlana Serchhip biala party hrang hrang president-te nena an chuhho ṭuma thlan tlin a nih loh chungchangah C.Lalramzauva chuan Serchhip bial mipuite a dem loh thu sawiin, Serchhip bial mipuiten Chief Ministerial candidate an thlang tling chu an tihâwm tak tia a ngaih thu a sawi a, tun ṭuma by-election neih turah hian ding lo mahse a vui lo tih sawiin, Serchhip biala MLA a nih leh nih lohin kawngro a su lem lova, Serchhip bial tana thil ṭha tih a ṭhulh chuang lo tih sawiin, MNF party-in candidate an siam apiang an tlin theih nan theihtawp chhuaha a puih tur thu a sawi bawk.

Kum 2018 inthlana beiseina sâng tak nena Serchhip bial mipuiin khawngaihna lantira an lo thlan tlin, ZPM Chief ministerial candidate Lalduhoma chu opposition a lo ni ta si a, amah ngeiin bial mipuite chu kawng diklo a zawhsan leh tak si avang leh hmingchhe taka MLA a nihna bantir ngai khawpa, hre reng chunga humsual a dai luih tak siah chuan Ser-chhip bial mipuiten an khawngaih lehna chhan tur sawi thiam a har tawh hle a ni a ti a, Lalduhoma khawngaih loh vang ni lovin, Serchhip mipuite keimahni kan inhma-ngaih thiam pawh a ṭul ve tawh a ni tiin, Serchhip bial mipuiten ruling bial nih theihna chance an nei leh chu vanneih-thlak a tih thu a sawi a, tun ṭumah chuan Serchhip bial mipuite chu khawvar hnua inthlang tur, engkim hre sa leh hmu tlang saa vote thlak tur an ni tawh a, chuti chunga an la thlang sual fo a nih chuan a mawh chu an chungah a tla ve tawh ang a ti bawk.

C.Lalramzauva hi MNF Gen. Hqrs. Secretary C.Lalzamlova leh MNF Serchhip East Block hruaituten an ṭawiawm a ni.