MNF sawrkarin kum 2 chhungin Mizoram sum leh pai dinhmun an tihchhe vek:Hawla

Mizoram Pradesh Congress Committee (MPCC) President Lal Thanhawla chuan MNF sawrkar chu Congress sawrkarin hnathawhna tur cheng vaibelchhe tam tak an hnutchhiah chungin kum 2 chhung lekin Mizoram sum leh pai dinhmun an tichhe vek niin a sawi.

Nimina Lal Thanhawla Auditorium-a kum 2021 atana Congress Bhavan hawnna inkhawm an neihah he thu hi sawiin, Lal Thanhawla chuan ram sum leh pai enkawl kawng-ah Congress sawrkar kha Pathian zarah kan che ṭha thawkhat viau a. Sawrkar hnathawk hlawh pûksak kan nei ngai lo a, GPF, Pension leh Bill hrang hrang kan pe thei zel a ni,” a ti a, MNF sawrkarah chuan Chief Minister berin pawisa a tam thu a sawi reng chungin sawrkar hnathawk hlawh an pûksak a, GPF lâk theih a ni lo a, pension hoten pawisa chhuahpui tur an nei lo a, contractor-te bill tam tak a tâng mek bawk a. Hetiang a nih avang hian mipui chan tur hi beisei ngam pawh a ni lo, a ti a, “Pathian zarah kan lo sawrkar leh a nih chuan Mizoram sawr-kar sum dinhmun hi kan siamṭha leh ang a, tute emaw anga vote zawn nana mipui bum kual mai mai lovin khawvel thang milin Mizoram hmasawnna turin hma kan la ang,” a ti a, he hunah hian Lal Thanhawla hian mithar 103 a lawmlut nghal niin MPCC thuchhuah chuan a tarlang a, he hunah hian 2021 AMC Election lo awm tura Congress Party Candidate tur puanna neih nghal a ni bawk.

Congress Legislature Party Leader leh MPCC Treasurer ni bawk Zodintluanga pawhin thu sawiin, “MNF sawr-kar chu sum leh pai enkawlna kawngah a hlawhchham chiang hle a, Congress sawrkar sum hman bân sa an hman zawh tawh hnuah phei chuan Contractor te bill pek tur an nei tawh lova, keini MLA-te tak ngial pawhin a hun takah hlawh kan la thei tawh mang lo. Hripui leng kar-ah engtin nge mipuite an him theih ang, tih aiin hripui hmang-in engtin nge sum kan hmuh ang tih an ngaihtuah a, CM Relief Fund hman danah mipui an lungawi tawh loh avangin CM Relief Fund-ah sum an chhunglût ṭha duh tawh lo a. Central BJP duhthusam tihhlawhtlin nan Pathianni-ah curfew an puang a. Kristian nêk-chepna a ni tih hre reng chungin BJP duhdan an tihhlawhtling a, chhun lamah mipui kan ri luih luih a, zan lam inkhawmna hun ṭha kan neihna turah curfew an puang zel a ni,” a ti bawk.